啡站情緣（四）

忙咗六晚，臨尾更通宵仲要收工前發現列車其中一道門甩骹。即刻去趕工修理、再檢查、測試，搞完天都白晒，眼袋黑晒。

返到屋企，一撻落床就好似一副跌落地下嘅模型咁樣散晒，差在手手腳腳未斷開。平日會沖好涼先瞓嘅我，今朝一合眼就不省人事。

差唔多三點，西斜嘅睡房好似焗爐咁，熱到我醒咗。除低身上污糟同有汗味嘅衫褲，沖乾淨個身，就着返條平腳褲行出浴室。

見有啲肚餓，我走入廚房打開雪櫃。我拎咗裡面過咗期一日但未發霉嘅方包、開始有黑點嘅生菜，同應該仲食得嘅火腿出嚟。然後將未壞嘅生菜揀出嚟洗洗，開咗電子爐煎煎啲火腿，夾咗幾塊三文治嚟頂肚。

狼吞虎嚥食完呢份希望唔會令我肚痛嘅三文治，洗好用過嘅碟同鑊，心諗計埋今日會放三日假，要出街補補倉。

出門行去商場，又經過零三啡站。我見到嗰個圓碌碌嘅女侍應喺度抹部咖啡機。

雖然自己本身無飲咖啡嘅習慣，但佢講過要我試佢沖嘅咖啡，於是就當支持一下，行過去檔口買一杯。

「唔好意思，我哋已經收咗舖……」

我未開口，圓碌碌嘅女侍應已經請我食閉門羹。

「咦，原來係你。」

「係…係呀，你話叫我試你沖嘅咖啡嘛。」

「你早啲嚟嘛……我哋平時四點半開始洗咖啡機，清潔同執好個啡站，準備五點鐘收舖。」

「唔緊要喇……我都係想去商場買啲嘢，咁啱行過諗起。」

「諗起想要我嘅第一次？」

「係……我指你第一次你沖嘅咖啡。」

「梗係啦，唔係你以為係咩？」

「其實我都係第一次……我本身無飲開咖啡，平時飲開奶茶多。」

「哦～原來係青頭仔。」

我知佢唔係指其他事，但言者無心，聽者有意。

「我講下笑咋，無其他意思。」

「你好似好鍾意講呢類笑。」

「係咪令你覺得我係隨便嘅女仔？」

「唔……唔係……」

「我唔係特別鍾意講呢啲嘢，不過無話題，咪講下呢啲囉。」佢伏喺個磨豆機上面，「要唔要等我放工，然後一齊去商場食個飯，傾下其他嘢？」

「唔……唔使喇……」我反射咁耍手擰頭，「我啱啱食咗嘢，未咁快肚餓。」

「嗯……」佢斜斜哋抬起頭，雙眼依然望住我，「唔駛咁驚，我純粹想搵隻飯腳啫。」

「下……下次，一定有機會。」

「咁幾時過嚟飲咖啡？我呢幾日都會返工。」

「好……我得閒過嚟。」

「唔好好似啲老嘢咁，講完得閒飲茶就當無件事。」

「當……當然唔會。」

「記得喇，唔同你講，我返去執埋啲嘢，拜拜。」佢揮一揮手，眼同嘴笑住同我講。

「拜拜。」我同佢揮手，轉身前佢都一直望住我。行開咗一段距離，我回頭再望向啡站，見佢竟然依然望緊我，仲再次同我揮手，搞到我唔好意思，點咗下頭就急急腳走咗。

入到商場超市，拎咗啲雞蛋、麵包、沙律菜同雞肉後，行入飲品嗰條走廊，見到一樽樽即溶咖啡粉。我隨手拎起咗一樽嚟睇。阿爸阿媽成日話咖啡苦，搞到我一次都未試過，既然搬咗出嚟，唔使聽佢哋支笛，好唔好買嚟試下？

然後，圓碌碌嘅女侍應（依家應該轉口叫女啡師）個樣浮現眼前。佢甜美咁笑住同我講，試下喇，唔試點知呢？

係囉……點解唔試呢？

點解頭先唔同佢去食飯呢？

隻鹿自己走埋嚟都唔識脫角？

「唔該借借！」

一個陌生大嬸打斷咗我思路。

我將嗰樽咖啡粉放入購物籃。

咪試下囉……唔試又點知鍾唔鍾意呢……

執多少少乾糧同牛奶入籃，去咗俾錢後離開超市。望望手錶已經六點幾，女啡師係咪一個人食緊飯呢？

我一路行一路諗，好唔好去美食廣場撞下佢？

之但係，喺我猶豫之間，雙腳已經幫我行咗出商場。

咁又係……啲肉同牛奶唔等得，要盡快放入雪櫃……

況且我都拒絕咗人，無理由又搵返佢嘅。

當我自顧自諗嘢時候，雙腳又擅自做咗決定，行咗去零三啡站附近。

啡站已經落咗閘，人去樓空。我故意行慢少少，等我可以望多幾眼。當街燈照向新簇簇嘅鐵閘，反映自己個樣時，我再一次問自己。

就算見到，之後想點？嗰女啡師係好似幾主動，但唔記得中學個鑊嘢嗱？

我用力呼咗口氣，望向被燈光污染嘅夜空，同自己講唔好諗太多。好快我就整理好心情，繼續行返屋企。

入到屋企放好餸菜，然後洗好沙律菜，另外用鹽醃好雞肉，蘸上蛋汁，放入滾好嘅油炸。我嘅晚餐就咁完成。

開住手提揀咗套電視劇食住煲，睇完一集剛剛好食完。我將用過嘅餐具洗好，然後攞咗樽咖啡粉出嚟。我潷咗兩羹粉入杯，倒入煲好嘅熱水，攪咗幾下。等佢攤凍一陣後，我呷咗一口試下。

可能我個啖太細，試唔出啲乜，於是我飲咗一大啖。

一陣酸苦味海浪咁湧入口，搞到我立刻衝入廚房吐出啖咖啡。將杯入面剩低嘅倒入鋅盤後，我不停飲水啷口，直至啷走口入面嗰陣味。

阿爸阿媽講得無錯，真係好難飲……我諗我以後都唔飲咖啡……

但係，應承女啡師喎……

到時先算喇……

將問題暫時拋諸腦後，我上返床開始煲劇。睇咗無耐，咁啱套劇講到男主角入咗去間咖啡店，搞到我又諗返起應承咗女啡師嘅事。

我搖一搖頭，將集中力放返入套劇入面。劇中男女主角一直喺間咖啡店傾計，甚至調情，愈睇愈令我將自己同女啡師代入戲內。

「應承我，你會返嚟。」劇中女主角同男主角講咗呢句後，一下子女啡師嘅圓臉就出現喺手機螢幕上，好似貞子咁要爬出嚟。

「幾時過嚟飲咖啡？」呢句話忽然喺我耳邊迴響。

「我其實飲開奶茶……」

「但你應承咗我……你應承咗我……」

「咖啡好苦……」

「係咪想講完就算數？」

「唔係……」

我未講完，一頭散亂金髮嘅佢由螢幕撲過嚟，我「嘩」大叫咗一聲。

砰嘭！

成個人由床度碌咗落地，痛楚拉返我回到現實。我摸一摸頭同手腳，撳落去有啲痛但無流血。爬返上張床，拎起手機望望時間，原來已經五點半，好可能係我煲煲下劇瞓着咗發夢。

我試下合埋眼再瞓，但一合眼就記返起頭先個夢，結果點都瞓唔返，唯有起身擦牙洗臉。

有云「解鈴還須繫鈴人」，雖然咖啡好苦，但始終應承過女啡師，唔去始終唔係咁好。諗通咗後個人鬆晒，竟然喺張梳化度瞌咗一陣，直至九點先醒返。

我換咗套出街衫，未行近啡站門口，就見到女啡師遠遠咁向我揮手。

「果然有口齒喎。」依家過咗早餐時間，啡站無乜人幫襯，好快就輪到我。

「咁我應承過你嘛……」

「想飲咩？」

「是但喇……我都唔識……唔苦就得。」

「咖啡點會苦？」

「係咩？但我琴晚沖嘅又酸又苦；」我做咗個苦瓜乾嘅鬼臉，「講真如果唔係你，我應該唔會再試。」

「嘻嘻！」佢右手遮住半邊嘴笑。

「笑咩？」

「好多嘢；」佢嘅牙齒唔止整齊，而且雪白似牛奶，「笑你扮鬼臉、笑你唔識沖咖啡、笑你未飲過好嘅咖啡。」

「你講到咁叻，沖杯嚟飲下。」

「咁你要咩？」

「咖啡囉，仲有咩？」

「咖啡都有好多種：有濃縮、泡沫、瑪奇朵、美式等等；」女啡師開始如數家珍咁介紹，「沖法亦可以有好多，好似啡店一般會用意式咖啡機，家用就多數美式或者法式壓壺，比較講究嘅會用虹吸……」

見佢未有意思停嘴，我稍稍轉頭望下後面，好彩無人排緊隊，可以放心俾佢講。

「……豆嘅品種沖出嚟嘅味道都唔同。有啲會酸啲，有啲有果味，有啲有果仁味。另外烘焙咖啡嘅時間唔同，亦會影響味道……」

「唔好意思，雖然我唔介意繼續聽，但我唔想你阿頭話你掛住傾計……」

「我哋呢度好自由，反正依家又無客；」女啡師趷高腳確定我身後無人排緊隊，「不過講係無用，真正飲過先知。」

「我乜都唔識，你話事喇。」

「就中杯牛奶咖啡啦；」女啡師低頭撳收銀機上嘅螢幕，「通常啲人會講拿鐵，我反而包拗頸鍾意講牛奶咖啡。」

「幾錢？」

「既然係你第一次，就我請喇。」佢篤咗兩篤，一張收據就「噠噠噠」咁印咗出嚟，然後佢撕落嚟俾我。

「點好意思呀……」

「你知就好，上次請我食檸檬仲有免費咖啡。」

一時之間被佢串到語塞……

「下次唔會……」我只係諗到咁答。

「仲有下次？」女啡師拎起隻紙杯問，「你叫咩名？」

「下……阿昇……」

「點咖啡要留名，唔係我哋點叫你攞杯啡？」佢遞咗個紙杯俾隔籬個咖啡師。

「係喎……」

企埋一邊等咗陣，啡站忽然傳嚟一聲響亮嘅「噗滋」聲，原來係調啡師打完奶泡，扭開咗支蒸氣奶泡棒，噴返剩低嘅奶出嚟。

見佢慢慢將奶泡倒入紙杯，令本來只有啡泡嘅表面，開始出現一個白色小圓形。之後調啡師將奶壺嘅左右郁動，畫出一條條白色嘅波浪。最後佢往前一拉，一枝白色嘅蕨就出現喺啡泡上。

「Stars，你嘅中杯拿鐵！」

我以為佢會叫我，但佢嗌嘅唔係我個名，望望周圍又唔見有其他客……

「叫你呀！」女啡師笑笑口咁同我講。

「我？」

「你叫阿星嘛！咪 Stars 囉！」