啡站情緣（三）

當列車駛入車廠，停喺維修站時，就係我開工嘅時候。

我會同另外三個維修員分批一頭一尾捐入車底，為繁忙時間工作後嘅列車做例行檢查同預防性維修。我哋會揸住強力電筒，照遍車底每一個暗角，將每一件車底嘅零件檢查得清清楚楚。

查完車底，我哋就扣好安主帶，爬上車頂檢查組件同天線，確保關節順暢同接口位無問題。

一旦發現組件有問題，就要立刻維修。如果問題比較嚴重，就要將車卡留喺站內，等夜更嘅同事做重大檢修。

由三點開始，唔計食飯時間嗰一個鐘，其餘嗰七個幾鐘就係對住部鐵。每一個下午，大約十五部鐵，所以我哋真係識條鐵。

跟崗時有一刻諗過，每日不斷重覆做呢樣嘢，會唔會好悶。

嗰時，師傅同我講：「你唔覺得幾百甚至幾千人坐喺你執得乾淨又安全嘅地鐵入面，係一件滿足嘅事咩？」

「我無諗到咁偉大。」

「唔……或者倒轉嚟講，如果因為你檢查得唔好導致列車出咗事，你過唔過意得去？」

「當然過意唔去，而且會無咗份工。」

最緊要我唔想重新搵過條出路，嗰條離開屋企嘅路。

「過意唔去同無咗份工係一種懲罰，的確令你會繼續做落去，但你唔會開心。講真每一份工都係重覆做份內相同嘅嘢，令你開心同滿足做落去係嗰件事嘅意義，只不過每個人嘅睇法好唔同，呢樣嘢你要自己去搵。」

「感覺好似要喺無止境推石頭裡面搵意義一樣。」

「係幾似嫁……不過最緊要你唔覺得荒謬。」

嗰陣無耐，就發生咗一件荒謬嘅事。

有朝同阿媽又鬧完交，心情非常差，晏晝教嘅嘢完全入唔到腦。夜晚放工後，超唔想返屋企，就偷偷地去咗平時無人去嘅車廠一個角落，諗住喺卡車廂裡面瞓一晚。

點知入到架車廂，聽到有啲奇怪嘅「啐啐」聲，又有啲「唔唔」嘅呻吟聲。我一心好奇，一邊放輕腳步往聲音行過去。

外面殘餘嘅工業射燈光照入車廂，我見一個同我差唔多年紀嘅男仔企咗喺度。

望真啲，佢一絲不掛，兩隻腳夾住扶手柱，用成個身體同春袋係咁磨，右手唔停咁擢住自己陰莖。擢咗陣就好似小朋友咁左手揸住條柱咁轉圈。轉咗陣就將自己拋到不鏽鋼座位上，當正係自己張床上面咁喺上面左右翻滾，右手從未離開過條嘢。

跟住佢狗爬式爬到咁啱面向我嘅靠門座位。佢左手揸住鐵枝，不斷上下舔條鐵枝外，仲嘟起嘴唇，激烈咁同旁邊塊強化玻璃法式濕吻。

我被佢個非常猥褻但又極其享受嘅樣嚇到成身係咁震，自己亦驚到唔識應該點做。

無耐，佢跪咗起身，係咁用乳頭分別喺鐵枝同玻璃上捽，右手加快套弄動作，甚至用陰莖敲住鐵柱同玻璃。到咁上下，佢低吼一聲，身子往後一退，一道白液狠勁咁射咗喺玻璃上面。

我趁佢正值賢者時間，立刻轉身走，點知腳唔聽使，一用力時竟然腳軟，「嘭」一聲跪返喺地。

咁靜嘅環境有咁響嘅一聲，個男仔當然唔會聽唔到，即時醒過嚟撲向我。好快佢就騎住只係爬咗幾步嘅我，右手壓住我膊頭，左手揞住我把口唔俾我大叫。

好彩佢唔係用右手……

「可唔可以唔好大叫，聽我解釋？」佢好緊張咁講。

我點點頭。

「真係？唔好呃我，求下你。」

我打咗ＯＫ手勢。

佢慢慢鬆開咗佢左手，但依然未放低介心，右手仲係撳住我。

「你唔凍咩？不如著返衫先……」我唔想再見到佢高潮後嘅短小陰莖喺我面前揈嚟揈去，更唔想有餘精滴落我衫褲上。

「好……但應承我唔好走，聽我解釋……」

「得嘞，駛唔駛勾手指尾？」

佢「哈」笑咗一聲，企起身去咗不鏽鋼凳另一端，攞出自己套衫着返。本來我想趁佢着衫時走佬，但又好奇佢會講乜。佢着好衫後，行返過嚟伸出右手想拉起依然坐喺地嘅我。

「唔駛喇，我自己起到身。」我望望佢隻手，又望望嗰塊強化玻璃。

「對……對唔住……」佢睇嚟會意，縮返隻右手，「你坐喺嗰邊張凳等多我一陣，好無？」

「可以……」我坐咗喺佢典完嗰張凳嘅對面，見佢打開背囊，攞咗張紙巾出嚟，將強化玻璃上嘅精液全部抹乾，然後又攞咗包滴露殺菌濕紙巾，將頭先佢舐過磨過嘅地方仔細咁抹咗幾次。

「你要唔要？」佢將濕紙巾遞過嚟，我抽咗一張抹抹臉同手。

濕紙巾抹走咗個男仔嘅手汗味，但當然點都抹唔走我腦裡嘅記憶。將來當我夜晚見到車廂裡無人嘅空凳時，一定會諗起今晚嘅事。

事後功夫做得妥妥當當後，佢坐喺對面之前典過張凳，望住我雙手亂搓問：「你唔會爆出去，係咪？」

「我無圖無真相；」我聳聳膊頭，「而且講出去對我又無著數。」

「咁又係……」佢好似放心咗，雙手定咗落嚟。

「咁點解你……？」

「我……」佢吞吞吐吐，欲言又止。

「你唔係要我聽你解釋咩？」

「我本身係鐵路迷，身邊好多朋友都知；」佢抖咗口氣繼續講，「細細個阿爸阿媽問我要咩玩具嗰時，我都話要火車。我可以喺玩具店望住啲玩具火車系統一個下晝，睇啲火車點樣設計、路軌點樣連接、訊號點樣同步等。到大個咗，第一次去火車車廠參觀，更加對火車嘅構造著迷。」

佢見我專心聽緊佢講，就繼續講落去。

「當你諗到，一架載住差唔多三千人嘅列車，竟然係由無數舊細小零件同齒輪組成去推動，係咪好神奇？」

「幾啦……但我無你咁興奮囉……」

「我明，唔緊要；」激動完嘅佢繼續講落去，「就係咁我就入咗嚟讀高級文憑。我好想再睇多啲，了解多啲。開始時我安份咁聽師傅講解，跟其他人一齊學習，但愈嚟愈覺得唔夠，好想自己一個去探索車廂嘅一切。於是，我有時放咗學或實習完就偷偷地竄入嚟望下架車，甚至捐入車底摸下零件同車軸。」

「咁點解你會做埋啲咁嘅嘢？」

「雖然無乜可能，但我一直夢想有個同樣鍾意鐵路嘅女朋友，想同佢喺地鐵上結婚行禮，甚至……可能呢排我無……所以精蟲上腦諗歪咗……」

車廂依舊吸收外面工業射燈嘅殘光，但對面嘅男仔已經由一個變態佬，變成一個對火車地鐵重度迷戀嘅癡漢。不過，我反而尊敬佢，至少佢為自己鍾意嘅嘢，放晒成副精神、心機同時間落去。

「咁你點解讀鐵路？你係咪都好鍾意火車之類嘅嘢？」

我一下子答唔到佢。我覺得如果我答只係咁啱地鐵公司推銷，而我又急住想離開屋企所以揀咗呢個文憑，好似侮辱咗一個真心鍾意鐵路嘅人。

「唔係……」我只能咁答佢。

「我都知唔係好多人好似我咁鍾意火車鐵路呢啲嘢，但你揀得呢行，應該有你嘅原因。」

「我都唔知道點解。」我冷笑咗一聲。

「你主修邊科？」

「我依家主攻車輛維修。」

「雖然你未必意會到，但你揀得維修，會唔會係你有啲嘢一直想修補而修補唔到？」

佢呢句話講到我心入面。

我回想招聘會內有各式各樣嘅工作或進修機會，點解會係呢個文憑、呢份工、呢條路呢？

或者潛意識唔經唔覺幫我揀咗。

「你忽然靜晒，無嘢嘛？」

「無……可能真係好似你咁講，我有啲嘢想修補。」

「唔介意咪講嚟聽下，應該唔會想維修銀河系卦？」

「唔係啦……」

當我猶豫緊好無同呢個陌生人講屋企嘅嘢時，一束強光射入車廂。

「你哋係邊個？係度做乜嘢！？」

一個身穿工作服嘅地鐵維修人員喺電筒後大叫。

「唔好意思，我哋係學徒，收咗工想傾兩句。」喺我驚魂未定，男仔已經鎮定回應咗。

「呢度俾你哋吹水嘅咩？」

「我哋依家就走喇，唔好意思……」

「下次再俾我見到你哋喺度，就同上頭講。」

「知道知道，無下次。」

我哋兩個雞咁腳走咗出車廂，頭都無回跑咗出車廠。

跑到出大街，抖返順條氣，我問佢要唔要去飲杯嘢繼續傾。

「唔喇……依家都夜，我想返屋企；」佢孭好自己個袋，「咩原因揀呢條路都好，如果呢個係你嘅動力，就繼續揸緊呢個原因做好份工喇。」

「多謝晒；」我豎起手指公，「你都唔好再偷偷哋入車卡搞啲咁嘅嘢喇。」

「哈哈，唔會啦，應承你。況且被人發現，無得做自己鍾意做嘅嘢，就得不償失。」佢向我揮手後轉身，「係咁先喇，拜拜。」

「再見。」

我之後先發覺，我唔記得問佢個名同電話；然後發覺直至兩年後嘅今日，我同佢無再遇見。

但係，佢令我搵到做維修地鐵嘅原因。

所以就算只係一種心理投射，當諗到幫咗一班無論係分隔兩地或歸心似箭嘅乘客，我就感到好安慰。