一日有廿四小時，扣除必要瞓覺嘅八個鐘、進餐及二便大約兩個鐘，仲有十四個鐘；再者與父母同住，煮飯打掃等家務都唔太需要我去做，呢十四個鐘可以話係完全由我控制同選擇點樣過。我可以出街玩、或者睇書學習進修備課、去組紐工房幫手、甚至到繩藝廳練習。然而，喺今日——寒假嘅第一日，我花咗所有嘅時間，好似非洲大草原中嘅水牛，警戒著眼前不動卻虎視眈眈望住我嘅手機。 「等我聯絡你。」 記起琴日離開輔導室之前，老師喺我手機內嘅通訊軟體，加入咗自己嘅帳號，並將佢成為密友清單中嘅唯一成員。 「我需要好好諗下點樣輔導你呢個壞學生。」佢無等我反應，就大步走返去教員室，留低一片茫然嘅我。 究竟咁樣係咩意思？我一直諗唔透。我唔會否認妄想過自己好似電影情節般喺度被佢引誘，但實在諗唔到一個合理嘅原因令佢選擇我，而唔去「安全」、「正常」咁搵其他男人去滿足佢嘅需要。 如果呢一刻手機螢幕真係顯示佢嘅訊息，我應該理會，定係當睇唔到？ 「你成日心不在焉，隔無耐就望手機，無事嘛？」媽媽喺晚飯時問我。 「無……」我將炸雞吞落肚後講，「有個朋友話寒假約我去玩，有少少緊張。」 「女仔嚟嘅？」爸爸呵呵笑住話。 「唔……唔係……」我差啲哽親，「係一……一大班人去玩……卦……」 「即係有男有女？」爸爸繼續追擊，「有無心儀嘅同學？」 「爸爸唔好再玩阿仔啦……」媽媽插嘴後同我講，「你第一次同新朋友去玩係會緊張啲，要放鬆先唔會影響心情。」 「係……知道。」 我心裡苦笑，食完飯幫忙收拾後返入房。 手提電話熒幕閃咗一下。 怦噗、怦噗、怦噗。 睡房只聽到心跳聲。 我稍稍平復，戰戰兢兢拎起手提。 「盛屋市天氣預報：明天密雲……」 「蠢材！」我暗自大罵一聲，將手提丟到床上。 然後手提電話好似烏鴉咁回應咗一聲，我心煩得怨咗句：「又咩事！？」 再次拎起電話一睇，短訊欄上顯示咗一句。 「寒假第一日過成點？」 我唔知應該點覆佢，諗嚟諗去只識得回「還可以」。 「講大話嘅學生需要輔導。」 我心頭一震，唔知點答佢。 沉默咗幾分鐘，手機傳來一句。 「星期二準備好，放學後嚟見我。」 「我唔明。」 「你點會唔明？」下一秒，程式顯示佢已離線。 手機無再俾提示。我瞓喺床上，問天花板應該點做，佢同手機一樣無頭緒。 兩日時間嘅思前想後，我發覺諗多無用，或者邊度結束，就由邊度開始。 星期二下年四點，我著返同嗰日相同嘅衣服款式，揹上同樣嘅背囊，帶上當日老匠人送我嘅初雪祭限定麻...
又睇返上年嘅年結先：
呢句係我前年講嘅，結果燈撚死咗自己……
2020年已經唔係特別好，2021年原來仲差。
我唔怕俾大家話戇鳩嘞……一月有日唔知係咪返完工太攰，成個人渾渾噩噩。平時唔會接陌生電話，嗰日居然接咗。對方話我戶口被人盜用，要我轉錢入個安全戶口。當日係週末，分行唔開無得查，對面係咁叫我唔好收線，電話背景聲就好似電影入面嘅緊急應對中心咁。之後就大家估到喇……
講真銀碼唔算多，平常打工仔一個月糧，不過當我想買一啲嘢時，就會諗如果無俾人呃，自己就可以有錢買；又或者買咗啲心頭好後，就會諗本來呢樣嘢其實唔駛錢。初時有啲耿耿於懷同自責，但sunk cost 係追唔返，唯有安慰自己已經過去。
心情平復過後，二月尾就投入續寫《嫖客》。本來只係短篇，但聽返唔少一九年嘅廣東歌，好多都沉澱咗當年發生嘅事，令我想寫出啲類似嘅嘢出嚟。寫嗰時搵資料睇返一啲當年嘅報導同短片，但同時亦有好多唔敢睇返。
篇文寫咗兩個月，諗返都幾滿意。當然作為旁觀者，我只能借新聞同想像去嘗試代入抗爭者嘅心情同行為，大約寫（或創作）出當時嘅情況同所感所受。我唔知各位睇上去會有咩感受，但肯定嘅係，即使我愈寫愈心翳，依然比唔上抗爭者們嘅痛千分萬分之一，而呢種創傷嘅後遺，佢哋無法再次觸碰。
《嫖客》之後，我就俾文友拉咗去玩徵文。本身係唔太鍾意，因為好似考試咁，人哋出條題目俾自己去寫；不過，見自己未玩過咪玩下囉。喺限期之前寫一篇貼題嘅文出嚟，真係壓力幾大。
投咗兩次稿，一次喺《小心輕看》，一次喺《青年文學獎》；兩次都落選。玩完出咗結果後，除咗壓力外，寫啱評審或讀者嘅口味真係好難，相信寫開偏門嘢嘅我應該永遠唔會寫中，所以以後好大機會唔會再玩。
到咗八月，又一件事大大打擊咗我，就係細個好錫我嘅婆婆過咗身。其實佢年事已高，幾年前佢以輪椅代步，我已經預咗佢得返兩三年命。只不過估唔到係佢半夜忽然起身，喺屋企漫無目的咁行嚟行去後跌倒入院。
雖然見過唔少生老病死，但自己親戚嘅始終唔多，更甚嘅係最錫自己嘅人。見到佢不省人事，上晒氧氣，手臂因為打靜脈針瘀晒，心情無得唔沉。醫生講過情況唔樂觀，舅父同阿媽有晒心理準備。最後，唔到三日就走咗。
至於身後事，唔輪到我插口插手，只能精神上支持阿媽，然後睇住婆婆化作一縷輕煙飄走。
可能係投稿用晒力，可能係婆婆死後無心情落筆，可能係 Far Cry 6，總之跟住無寫嘢三個月。直至近來先回想下今年發生嘅一系列小事，然後串埋再加鹽加醋加幻想，寫緊篇叫《啡站情緣》嘅故仔。
唔敢再講二二年想點，未燈死過自己咩，共勉之喇。
留言
發佈留言