或者肚餓嘅緣故，老師所謂嘅換衫，我要飯後留意到。 乍看之下，佢依舊戴住幼框墨鏡，圍起嗰條棗紅色嘅頸巾，身穿同一件長長嘅大褸。直至我哋將午飯套餐食完，老師離開座位付錢時，我先見到佢雙腿裸着膝頭，套起一對長筒雪皮靴。 離開旅館之前，佢從口袋內拎出冷帽及皮手套戴上，但膝頭依然暴露於空氣中，任由寒風恣意吹刮。我唔明白。點解佢之前緊張我嘅衣著唔夠抵冷，依家自己卻對膝頭毫無保護。 我無法按住自己嘅好奇，同時帶住對呢種雙重標準嘅不滿，各自上車坐好後問：「你咁樣着唔凍？」 「我有好似你咁樣跳嚟跳去咩？」佢嘲笑話，「你唔知女生忍耐能力比男人犀利？」 「男人唔係強壯啲咩？」 「喺冬天，你會見到唔少女性着短裙，但你會唔會見到男性着短褲？」 「又……又好似係……」我諗起落雪嘅街道，情景的確如此，「但點解要咁樣做？」 「因為想做。」 「就係因為呢啲……」我怕激嬲佢，壓低咗聲音，「毫無邏輯嘅原因？」 「所有嘢到最後都係毫無邏輯，只有喺結果上俾到自己咩嘢意義。」 「就算係痛楚，或者係受苦難，只要俾到意義自己就可以？」 我嘅說話有如落喺地上嘅雪花，埋沒於白茫茫嘅寂靜雪堆中。 老師開咗差唔多一個鐘嘅車，到咗一個細小嘅公共停車場。佢示意我帶好背囊落車，然後我哋行到一個有指示牌寫住「雙繩滝．五百米」嘅山路入口。裡面山路唔算崎嶇，但因為融雪使得路面濕滑，有時要用手扶住左邊嘅石牆而行，避免跌落右邊嘅山崖。十幾分鐘後，不遠處出現一個用木柵圍住嘅小看台，老師加快腳步，幾乎喺踏上看台前跣倒。 走到看台，見老師已經背向我，四十五度抬頭望向前方。我沿住佢視線，兩幕水藍冰瀑就似霧雪中打出兩道冰雷，劈開堅硬峭壁石崖，散出尖銳如箭嘅冰錐從隙間湧出，一支支向住我雙眼直衝而來。 呢一刻，面前看台變成另一個空間。喺嗰度，所有東西被凝結。來勢洶洶嘅瀑布喺吞噬看台嘅一刻前被凝結，河內欲游嘅魚喺擺尾一刻前被凝結，本來心急差啲滑倒嘅老師喺呢刻都係被凝結。 我將被凝結嘅呢一刻濃縮喺手機入面。 可能我嘅動作，又或者時間已到，老師轉身走出看台，往左拐向石牆行去。當我正喺度疑惑嘅時候，佢喺石崖一個無咁斜嘅地方，踩上一塊石頭向上行。我追咗上去，發覺呢個位看似無路，但有輕微被行過嘅痕跡。抬頭一望，老師以近乎手腳並用嘅姿勢爬上石階。我立刻追咗上去。 呢條路既未被開發，而且又斜又迂迴，再加上雪滑，即使我對自己體力算有信心，都覺得一啲都唔容易爬。然而，我...
我望住手上嘅狗圈，一直諗住院長嘅說話。古語有云：「做隻貓，做隻狗，不做情人」。做情人會令自己豬狗不如。本身學歷已經是低，依家又如她所講，工我已經無可能返到。咁樣做人又喺呢個世界無意義，不如疊埋心水做院長隻狗好過。 只係，每次我想將狗圈移近頸時，總會有一種唔甘心。差唔多三十年來，我無乜去追求過啲乜。心知無其他人聰明，無去追求過學業；然後就無去追求事業嘅晉昇，更無心去追求異性嘅信心。 我一直怕失敗，結果一直將自己縮到最細。結果一直喺一個密封的圓裡面，甚麼也進不去，甚麼也出不來。沒有輸出，沒有輸入。 直至「采妮」喺地鐵嘅露出。我本以為只係表面上嘅特殊性癖行為，但諗深一層，呢個行為，或者「采妮」，就係想話俾我知我需要解放。我需要勇敢地將衣服褪下，赤裸裸在世界中表現自己嘅無力同無能，先有機會進步。 知恥近乎勇，應該就係咁解釋卦？ 「留住佢先喇。」院長係咪見我諗咁耐而唔耐煩呢？佢吐出一口煙後企起身，行到我身邊拍一拍我膊頭講，「此時此地諗唔到，就出去走走用心諗下。下次我見到你時，一係你將佢還俾我，一係你將佢戴起，唔好猶豫。」 「當然，我好希望你快啲將佢戴喺頸上。」院長彎低身喺我耳邊細聲講。紅色唇膏嘅香氣同電子煙嘅薄荷味重得連耳仔都聞到。 佢閂埋門走咗後，呢間亂七八糟嘅房又得番我一個。撕到碎晒嘅海報、踩到爛晒嘅影碟、臭到薰天嘅雪櫃，等等喺屋企嘅嘢，令我作嘔。我從未想過自己會咁厭惡自己嘅屋企。呢個一直以為係自己天堂嘅地方，原來同我一樣脆弱，一樣受唔起丁點風浪。 我好想知仲有咩剩低，於是我開始執屋。首先，我將所有地下曾經係我珍重如寶，依家已經係垃圾嘅爛海報、爛影碟全部丟入垃圾袋。單係呢啲嘢，用咗我四個大黑色垃圾膠袋。我嘲笑自己一下，笑自己沉迷呢啲虛無嘅嘢咗咁耐。如果我能節制啲，或者依家生活已經唔一樣。 可惜世界無如果，有嘅話我就唔駛清理呢個充滿爛生果爛蔬菜嘅雪櫃。一打開櫃門，有如喪屍瞓咗一晚嘅腐臭味撲出來，臭到我立刻打開幾日未開嘅窗，不停呼吸窗外「比較」新鮮嘅空氣。 呢陣臭味雖然令人噁心，卻令到本來渾渾噩噩嘅我，一下子集中精神。陣味散咗一陣後，我忍住呼吸盡快將啲出晒水嘅蔬果丟入垃圾袋。發黑嘅肉同已經過期到凝結嘅牛奶當然一併丟掉。臭水倒入鋅盤，再檢查下有無未過期嘅食物。無。成個雪櫃清空。 抹好個雪櫃，再望望廚房。得番一雙筷子、一套碗碟、兩條碗布...