六點四十五分。 火車站正等待更多上班通勤族出現，而我同樣地等待一個人出現。 時間尚早。我心諗，但老師唔出現，始終心有不安，怕佢突然改變主意。 將近七點，趕返工嘅乘客愈嚟愈多，佢哋步伐急促，有如古戰場嘅亂箭喺面前左右飛過。一張張不時望起手錶嘅焦躁臉容，令我亦不自覺搓起雙手，右腳踏起快歌拍子。 一節短而悠揚嘅音樂響起，提醒火車站內眾人整點已到。接住一段早晨廣播，提示乘客保持秩序及小心財物，當然唔少得車站店舖趁機宣傳自家嘅商品及折扣優惠。 「天崎超市每日新鮮出爐嘅麵包，讓你精神開始每一天～」 「阿爾卡週五限定椿子咖啡，誠意為你早上加倍能量！」 喺腦內自製一陣咖啡香氣嘅時候，眾多與我不相干嘅亂箭之中，竟然有一支向我射過嚟。我立刻回過神，發現佢正係我等待嗰支箭。 嗰支令心臟不為焦急，而是因為興奮、期待同緊張嘅邱比特之箭。 我見過學校內戴上眼鏡時成熟穩重嘅佢、見過化上濃妝喺紅燈區流連嘅佢、見過自家內素顏隨便嘅佢；而今日我見到佢嘅第四面，一個化起淡妝嘅，著上鮮豔顏冬季運動裝嘅佢，予人一種活力充沛、準備冒險嘅印象。 不過喺佢微笑向我打招呼時，明顯臉容帶倦，與裝束有明顯出入。 我以揮手及「早晨」回應，喺未諗下一句前，佢遞上一張上面寫住去雨見川市嘅火車票，「仲有半個鐘，我哋去買啲早餐及飲品上車。」講完就轉身往附近嘅便利店走去。我快步跟上佢嘅背影時，可能被剛才嘅廣播影響，好想去拖起佢左手，拉到天崎超市嘅方向，買一個令佢精神飽滿嘅麵包，然後再去阿爾卡買杯椿子咖啡，幫佢掃走倦容。不過只有半個鐘時間，應該趕唔切，於是我按住自己嘅衝動，手到只伸出半吋就停低。 走入便利店後，老師手快咁將一個明太子飯團、一個燒鮭魚飯團，同一支紅茶放入購物籃，就去排隊俾錢。我要到差唔多輪到佢時，先揀好杏仁牛角包及一罐咖啡。 「咁少夠食？」佢將我揀嘅物品直接放上櫃台。 「夠食……」收銀員已經所有商品條碼掃完，膠盤正耐心等待一千三百八十日圓嘅來臨，「我嚟俾錢。」 「我講過所有費用都係我出。」佢喺我攞出萬元大鈔時，已經用信用卡俾好錢；「你收返埋啲錢。」 澀澤榮一只好乖乖返回銀包。 銀包返入褲袋前，佢已經攞起膠袋出咗便利店。「至少俾我拎住？」我伸手去攞個袋，無意間捉到佢隻手。嗰刻我有諗過縮，但從毛冷手套散出嘅涼意令我唔想鬆手。意外地，佢亦無意甩開我。就咁樣，我拖住佢揸住膠袋嘅手走到票閘前先分開。 入咗閘，上樓梯到達月台，一列...
第一眼望到「采妮」二字嘅讀者可能會問，《采妮》係咪用楊采妮做藍本。其實係咁……
多年前，我買咗本《圖解哲學》嚟睇。雖然講嘅嘢非常片面，但打開咗我對西方哲學嘅興趣。當中我對尼采嘅哲學甚感興趣，及後睇咗半本《查拉圖斯特拉如是說》，更對書中所講嘅精神三變感受好深，覺得係一種熱情而有生命嘅思想，亦係我認為我所缺少嘅嘢。於是，我就喺一九年情人節落筆寫咗《采妮》呢個故仔。
《采妮》雖然未算得上獵奇官能，但叫突破咗我一啲心理關口。當中寫咗唔少露出同口交情節，就好似係我嘅思想解放同爆發，而采妮就係嗰個荼毒我嘅人、物或事。當時喺 medium 發佈真心驚有人會篤灰或謾罵。最後竟然有人爆我clap，有人想睇後續，有人係佢自己喺post推薦，真係奇蹟。後續嘅情節一如電影續集般，收視比唔上第一集，但俾咗我好大信心，同話俾我聽可以喺用字、情節同題材上可以大膽同出位啲。
嗰排睇完《ERROR 自肥計劃》，臨尾有段訪問格仔 Mike 導。佢講佢自己拍緊一啲好奇怪嘅嘢，唔肯定出到街啲觀眾有咩反應。同時佢亦覺得嗰刻好正，因為佢行緊一啲好特別嘅路，而呢啲路亦只有佢哋去行。聽完後，我覺得《采妮》都係走緊呢條路。一個將哲學好直白咁放入甜故劇情，相信唔多人做過。可能讀上嚟會覺得我拋書包，但呢個就係《采妮》嘅風格，只要引用嘅哲學理論無大錯就可以。
我成日都話「寫作等於自慰，有人睇係 bonus」，於《采妮》呢篇怪雞嘢而言尤其正確，在此深深多謝曾經喺 medium 拍過手嘅諸位朋友外，特別要多謝白投浪私訊我對《采妮》嘅評價。《采妮》能夠有知音人，實屬本人嘅大幸。
打飛機自慰無罪，但寫文自慰最好有個序，特此落筆。既然寫故係自慰之用，如果讀者唔介意十八禁同本子向嘅劇情，又想睇啲非一般甜故，希望多多支持。
留言
發佈留言