開心

「游醫生，唔好意思……」護士喺我下午巡房時同我講，「二號床嗰位病人又走失咗……」

「得喇……我睇完啲病人後會處理。」我合起手上嘅病歷紀錄，同眼前嘅病人講佢手術後復原進度比預期好，就快可以出院。

「佢嘅情況可以好反覆；」正當我打開下一位病人嘅紀錄，身邊嘅芷蔚以近乎搶嘅速度拎走份檔案，「我會搞掂剩低嘅病人，你去搵佢喇。」

「姚醫生，咁樣唔係太好……」我以搓手液消毒雙手，準備入房檢查下一位病人。

「你知佢只會聽你講。」芷蔚行前一步，喺病人房門前擋住我，「而我知你好緊張佢。」

我的確無辦法放低佢去專心睇其他病人，只能夠聽芷蔚嘅說話，轉身走出病房。我掃開電話打俾佢，好快佢就接咗。

「張綠瀅，你喺邊度？」我劈頭第一句就問電話旁邊嘅佢。

「樂楊，你點會唔知我喺邊？」綠瀅愛理不理，淡淡嘅一句，令我有啲憤怒。

「你知你嘅病況，唔可以亂咁走；」我提高聲量同綠瀅講，「我依家過嚟搵你。」

我走出醫院主樓，往後面嘅斜路行去。斜頭嘅盡頭係醫院範圍邊界嘅一個花園，既可以望出院外城市嘅繁華，亦可以眺望遠處海洋嘅寬大。好多病人都鍾意行到嚟呢度，放鬆心情，同時讓眼前景物鼓勵自己早啲康復。

就喺花園嘅其中一個角落，我搵到綠瀅。

黃昏陽光下嘅佢臉容蒼白，肩膊急促起伏，我立刻跑去拉起佢右手，指頭果然有預期中嘅紫紺、探脈時心律紊亂。

「你知道你心臟唔可以做太劇烈嘅運動。」我放低佢隻手，緊張咁講。

「放心……我……仲行得完……嗰條斜路……抖下就無事……」綠瀅喘住氣講。

「總有一日你會咁樣而導致缺氧或心臟病發，死喺呢度。」

「咁都幾好……可以同紹藍死喺同一個地方……」

我臉色一沉，胸口揪咗一下。

「對唔住，我無責怪你嘅意思。」

我依然無語。

「我講過，當日嘅手術醫生都同你講過，嗰次係突發嘅事情，手術時經常發生。」佢嘅呼吸轉為平穩。

「但始終喺死喺我手上。」

綠瀅將右手放喺我膝上，見到佢手指嘅紫紺已經褪咗唔少，我稍稍放心。

「記住，你無犯錯，紹藍一定都係咁諗。」

「你係時候返去；」我盡量收拾心情，「我叫醫院勤務推架輪椅過嚟。」

綠瀅企起身，向花園嘅空曠地方行去。

「我唔想被其他人搵到呢個可以獨自享受嘅角落。」

「你仲當我係契哥嘅話，就應該答應做手術，咁就可以享受世界任何角落。」

「只有呢度我先感覺到紹藍嘅存在，況且你同佢應承過會醫好我。」

「技術比我好嘅醫生大有人在，唔好咁任性。」

「如果你仲當我係契妹嘅話，就俾我任性落去。反正我唔在乎手術成功與否。」

「你再咁樣，我會同護士講你匿埋喺嗰度。」

「你唔會；」綠瀅笑對我說，「因為呢個唔止係我同佢嘅角落，仲係我哋三個人嘅角落。」

勤務員喺我用無線電聯絡後十五分鐘，就將輪椅送到我哋面前。我道謝過後，推住綠瀅側坐上嘅輪椅落斜，進入醫院主樓，搭𨋢返到病房嘅樓層。

「樂楊，記住紹藍嘅死唔係你嘅錯；」綠瀅喺行入病房前講，「我咁做係想幫你。」

「如果你唔在乎手術嘅結果，我做嚟都無意思。」

「藉口。」

我望住綠瀅行入病房後，先放心行返去辦公室做埋啲嘢。伸手開門時，芷蔚正好喺辦公室行出嚟。

「頭先唔該晒你。」

「剩低嗰啲唔係聽日出院，就係等做手術，無乜特別大問題。」

「咁等我執埋啲手尾後，一齊食晚飯好嗎？我請。」

「你真係只諗住食飯？」

我知道唔應該咁樣對芷蔚，但我無出聲。

「今日平日，迷宮應該唔多人，陣間我打過去訂檯。」芷蔚無等我回答就下決定，「飯後嘅事，飯後再決定？」

「好……」佢聽到我回答後就好快行開去，我亦入辦公室坐低翻閱聽日病人嘅紀錄，為佢哋嘅手術做好事前準備。

無耐，電話顯示芷蔚嘅訊息，話已經訂咗七點鐘，我覆咗一個ＯＫ嘅圖示，就繼續做嘢。做到大概六點，我行出辦公室，落醫院樓下停車場攞車，揸到迷宮附近嘅泊車位停好，然後行入餐廳。

侍應話張檯嘅客人未走，問我要唔要去吧台等陣；我禮貌咁笑笑回應話係自己早到，所以無問題。我坐喺吧凳上，向酒保要咗杯龍舌蘭，一邊聽住輕鬆嘅音樂，一邊呷著杯中物。

「估唔到你咁早到。」芷蔚喺我陶醉於音樂時出現。

「正如你所講，無乜特別大問題。」

「你知唔知呢首係咩歌？」芷蔚忽然岔開話題。

我細聽耳邊嘅音樂，旋律好熟悉，但歌詞同我印象中有出入。

「好似係《粉紅色的一生》？」

「啱咗一半；」芷蔚用杯中嘅車厘子攪拌剛到嘅雞尾酒，「係《La vie en rose》；不過陳百強嘅改編版本都唔錯。」

「你好鍾意呢首歌？」

「係；」佢飲一口酒繼續講，「法文、英文、粵語，三個版本都好鍾意，而且每個版本俾我嘅感受同體會都唔同。」

我對音樂唔太熟，等佢繼續講，但佢無咗出聲，望住杯雞尾酒若有所思。直到我哋被帶到餐檯，揀好嘢食點餐時，佢先再開口。

「臨走前我見到院長，佢叫我問你幾時再做返開胸手術嘅主刀。」

「唔知……」

「佢知嗰件事對你好大影響，但你始終要將佢克服。」

「可唔可以唔講呢樣嘢？」

「院長話你係少有三十歲出頭就可以做主刀嘅人，唔想你浪費自己咁好嘅才能同技術。」

「夠喇！」

我大聲到有幾個人轉頭望向我哋。

「我會遲啲同院長講……」我校低返把聲同芷蔚講。

我哋靜咗十幾分鐘，等到侍應過嚟將凱撒沙律、淋上荷蘭汁嘅露筍、絲滑薯蓉、同埋餐廳著名嘅威靈頓牛扒放低後，就各自默默地食晚餐。

迷宮嘅菜色，不論傳統或新穎，都俾到一個舒服同慰藉嘅感覺，但每次用餐，我嘅心就好似喺一座透明嘅迷宮入面咁。我可以見到照住出口嗰盞燈，但當我向前行時就有道無形嘅牆擋住，無論我點推點撞都打破唔到。

然後我轉身，望向身後嗰片我曾經穿過嘅黑暗。我知道黑暗中必定有條路可以繞過面前無形嘅牆，只係呢片黑暗比以前更黑暗，甚至有種吸力，令我覺得行咗入去就返唔到出嚟。

結果，即使唔少喺出口盞燈附近嘅人一直支持或指引，我只係一直望住盞燈喺原地打轉。

侍應收起食完嘅主菜碟盤同餐具，重新放上甜品餐叉同我哋各自點嘅甜品時，我諗起面前嘅芷蔚。

我喺大學最後一年認識剛入大學嘅佢，發現大家嘅目標都喺心胸外科度，於是主動教咗佢好多嘢，分享咗唔少資料。到我完成咗基本嘅醫院輪值，開始喺心胸外科學習時，我又遇返佢。好自然地，我哋交換電話，保持聯絡。

紹藍死嗰晚，我飲酒消愁。正好佢打過嚟，我喺無辦法排解自己嘅鬱悶同內咎下，借醉同佢發生關係。事後雖然對佢有啲內咎，而且好大機會令我無得再繼續做醫生，但能夠短暫忘記紹藍嘅事，我一啲都唔覺得後悔。

「如果你以後有咩心事，可以再搵我，好過你飲醉酒影響第二日嘅工作。」佢嗰晚半裸坐喺床上，喺我着返衫時咁講。往後，我咩事鬱喺心就下意識地搵佢，而佢無過問任何事，喺床上承受我嘅一切。

「我希望你俾到院長一個佢滿意嘅答案。」埋單後佢喺門口同我講。

本來綠瀅再次入院已經令我意亂，依家芷蔚提起院長更令我心煩，於是我問咗一句：「今晚上你屋企得唔得？」

芷蔚好似預期我會咁問，望住我苦笑一下，微微點頭。我立即去停車場攞返架車，揸到佢屋企樓下。一入屋閂好門，我就如狼狂吻芷蔚嘅嘴。我一邊錫，一邊攬住佢行到睡房張床上。我壓住佢，由嘴錫到頸上，然後坐起身將佢所有衫褲除低。望住赤裸嘅佢，腦內就好似撥到另一個回路，理智同人性被無視，只係想將胸口嘅悶氣以原始獸慾去發洩。

今晚我心情比平時煩躁，動作變得比平時粗暴。我無用平時會用嘅潤滑劑，強硬地進入芷蔚只有半濕嘅身體；亦無理會佢聽日返工會否尷尬，用力喺佢頸上留低唔少吻痕。一次高潮過後，我罕有地依然堅硬，於是反轉佢身體，以後背體位再次進入，直至我心力同體力都耗盡，喺床上軟倒沉沉睡去。

叫醒我嘅係一陣歌聲。

Moon river，wider than a mile；

I'm crossing you in style some day。

Oh，dream maker，you heart breaker；

Wherever you're goin'，I'm goin' your way。

我睜開眼望向歌聲處，見到芷蔚喺窗台上盤坐，呆望外面遠處嘅白雲。我嘗試唔打擾佢，靜靜地轉頭睇鐘，但始終逃唔過佢眼梢。

「醒咗喇？」

「唔……差唔多要返工……」

「可唔可以幫我請病假？」

「對唔住……」我見佢滿頸都係紅印，開始覺得愧疚。

「我係成年人，呢樣嘢係自己揀，亦知道選擇後嘅結果；」芷蔚倚住窗邊說，「無咩好對唔住。」

「我……我會幫你請病假……」我唔識點去化解，只好趕快着好衫，走出眼前嘅窘境。

揸車返到醫院，早早換上手術服，一來要準備做手術，二來唔洗俾同事知道我無返屋企。幫芷蔚搞好病假嘅文件，見見陣間要做手術嘅病人，確認佢哋嘅狀況適合後，就去手術室準備一切。

做完今日嗰幾個微創心瓣復修後，又到下午巡房時間。所有病人手術後康復狀態理想，如果無咩突發情況，一個禮拜後就可以出院。

除咗綠瀅外。

「張綠瀅，你嘅情況已經穩定，但你堅決唔做手術嘅話，我哋無嘢可以幫到你。」

「我唔係唔想做手術，而係手術成功後對我毫無意義。」

「意義可以等你手術成功後慢慢搵。」

「存在先於本質嗎？」

「你唔係一件死物。」

「紹藍死後，我唔覺自己同一件死物有分別。」

「咁你可以辦出院手續。」然後我頭也不回，氣沖沖行返去辦公室。

綠瀅出院後，醫院所有工作喺我眼中回復正常。有規律嘅工作令我心情平復唔少。芷蔚兩日病假後返嚟，令手術更加順暢。我瞥見佢頸上嘅粉底特別厚，應該係用嚟遮住未褪嘅吻痕。

不過呢啲平穩嘅日子總係去得快。

呢日喺我放工前，綠瀅打電話過嚟。

「你今晚得唔得閒？」

「我得閒，可以揸車到你屋企然後出去食飯。」

「唔使，你上嚟我屋企，我有嘢想問你。」

「好……你無事嗎？」電話中嘅佢好緊張，但唔似因為病發。

「無事，只不過發現咗啲嘢……」

「我搞掂完啲手尾上嚟。」

放低電話後，我再次攞起剛才未睇完嘅病歷。不過聽到綠瀅咁緊張，我又點會有心情繼續做嘢。我嘆咗口氣，放低份文件，着返好件褸就離開醫院。

上到綠瀅屋企，我未坐低，佢就遞咗封信俾我。信嘅收件人係紹藍，而信封上印有一個人工受孕診所嘅標誌。

「咁係咩意思？」綠瀅問我。

「我都想知……可唔可以開嚟睇下？」

我打開信封，細讀信中嘅文字。信中提到紹藍嘅精子被一位女士選中，作為該女士人工受孕所用，最後診所代佢多謝紹藍無私嘅捐贈。

「你……你意思紹藍曾經捐過精……？」綠瀅全身一邊抖震，一邊問。

「照信上所講，應該係……」我答佢。

「佢無端端點會做呢啲嘢？」

我喺回憶中搜索咗一陣，跟住記起有次實習，佢同當值嘅醫生意見不合，搞到要大學插手調停。之後佢約我出嚟飲酒。佢飲到好醉，醉語間話以佢嘅天資，應該要永遠留喺世上，要去捐精等後世人可以繼承佢嘅聰穎。

當時我以為佢只係飲大咗亂噏，依家睇落佢好大機會去實行咗。

「你震得好厲害，使唔使送你去醫院？」我將呢段軼事話俾綠瀅聽後，佢開始有啲唔妥。

「你知唔知，我依家又驚又喜；」綠瀅眼淚忽然滴落嚟，「我感到自己會見返紹藍咁樣。」

「綠瀅……你唔係想……」

「係，我想有紹藍嘅ＢＢ。」

「但係你心臟嘅問題，根本唔適合懷孕！」

「你講過意義要自己搵嘅咩？我依家搵到。」佢淚中帶笑咁講，「你可唔可以幫我排期做手術？」

「就算手術康復後，懷孕對你心臟負擔都好重，好大機會有血管栓塞，甚至難產！」

「樂楊，我係成年人，呢樣嘢係自己揀，亦知道選擇後嘅結果；」綠瀅一對被淚沾濕嘅雙手，搭住我依然揸住封信嘅右手，「而且我相信你，相信你嘅技術會令我以最好嘅狀態去越過呢啲難關，達成我嘅目標。」

「我……我幫你問問主刀個期，睇下最快幾時可以做手術。」

「好，依家呢個世界只有你最靠得住。」芷蔚捉得我隻手好緊，就好似捉住懸崖垂落嚟嘅一條藤蔓，唔俾自己跌落去。

「放心，我一定會幫你。」

「我已經將個心放咗俾你啦。」綠瀅笑說。

我陪佢笑咗一下，然後勸佢早啲休息，佢話興奮都瞓唔著，叫我返屋企先。我再次叮囑佢早啲休息，就出咗門口。

上到車，我以為佢肯做手術，我會好開心。不過一諗到呢一年，我軟硬兼施咁勸綠瀅做手術都唔成功，然後佢一收到紹藍呢封信，二話不說就叫我幫佢排期；連一直逼我親手開刀呢件事都可以完全忘記，全身立即被一股挫敗感籠罩住。

到頭來佢嘅心，一直只為紹藍而開，我連想入去嘅縫隙都無。

我反射地打俾芷蔚，但當響到第三下時，我諗唔到佢點樣可以幫到我。依家嘅我被打敗、洩氣，連所謂嘅鬱悶都被打得灰飛煙滅。

於是，我收咗線。我開車到便利店，買咗一打啤酒後，揸車到醫院。趁夜晚無乜人見到，攞住打啤酒去咗花園，坐咗喺嗰個角落。

讀書時、實習時，我同紹藍實就喺度溫書、討論、訴苦，無所不談。我哋亦喺呢度遇到當時喺醫院做義工嘅綠瀅。自始我哋三個一有機會就約埋一齊聚會。

喺我哋就快完成心胸外科課程嘅前幾日，綠瀅同我哋講佢被診斷患有先天性心室中膈缺損。

「我哋就快攞正牌開刀，放個心俾我哋啦。」紹藍拍爛心口咁講。

「咁我就等你哋啦喎。」綠瀅笑說。

我初時以為佢哋得個講字，點知綠瀅真係拒絕當時醫生嘅勸告，話唔想做手術住；而本來對開胸手術興越缺缺嘅紹藍，變得積極向主刀醫師自薦做助手。

相反，我只係幫醫生勸綠瀅，同質疑紹藍嘅能力。

如果當時我可以多啲鼓勵同幫紹藍，綠瀅嘅手術就可以早啲做，紹藍甚至唔會發生意外，而我亦唔會放棄做開胸手術嘅主刀。

飲完第五罐啤酒，電話響起。

「你頭先打俾我？」芷蔚問我。

「係……但依家無嘢喇……」

「你把聲有啲怪……係咪病咗？」

「唔係……飲咗啲酒啫……」

「係咪發生咗咩事？」

「都話無嘢……唔駛理我……」

「你係邊度？要唔要我過嚟？或者你上嚟我屋企都可以。」

「芷蔚，你唔使再理我喇！」講完我就狠狠地收咗線，打開最後一罐啤酒一飲而盡。望住地上嘅空罐，我問自己仲有啲乜，可以做啲乜。

最後，我望住自己雙手，發覺自己只有做心胸手術嘅技術，亦只有呢樣嘢先可以幫綠瀅開心，達成佢嘅目標。

我執好地下嘅空罐，喺醫院大門口攞咗個口罩戴，遮住啲酒味，決定今晚喺醫院休息室瞓。

第二日，我巡完房、做完今日嘅手術，就聯絡心胸外科主管黃醫生，睇下佢幾時有期幫綠瀅做手術。黃醫生好快就覆咗我一個月後有期，叫綠瀅一個禮拜前入院做定檢查。

「其實你做都得喇。」主管同我講。

「你技術好過我，況且仲要跟你學嘢。」

「唔好咁謙，成個團隊都知你可以獨當一面，唔好俾過去嘅事影響到。」

我收線後，離開醫院前撞到芷蔚。

「你今日有心避開我。」

「我琴晚諗通咗。過去嘅事係我對你唔住，我只想以後你可以比依家開心啲。」

「我有講過我唔開心咩？」

「但我唔覺得你開心。」

「你只係將自己嘅唔開心投射喺我身上。」

我一時語塞。呢一刻我心裡面唔否認芷蔚所講嘅嘢，但同時唔想承認佢所指嘅事。

「我……我醒起有啲嘢未做，要先返去辦公室。」

「你除咗逃避，無諗過去面對咩！？」芷蔚喺我背後話。

呢一個月嚟，我幾乎每日放工後都打電話俾佢，確定佢按照營養師嘅指示作均衡飲食，照顧好身體。自己亦專心幫佢做手術前嘅準備，反覆確定手術嘅程序，需要注意嘅地方，同團隊之間嘅配合。

好快到咗綠瀅做手術嘅日子。

着住病人服嘅綠瀅坐喺架床上，睇上嚟精神飽滿，完全唔似禁食咗一晚嘅人。佢專心睇手機，不時兩眼發光好似見到寶物咁樣，喺螢幕前面發笑。

佢終於都留意到我喺佢床邊，遞咗個電話過嚟問我：「呢件衫仔好得意，依家買定好唔好？」

「你不如擔心下陣間嘅手術。」

「就算得你我都唔驚啦，何況仲有其他資深醫師；答我買唔買好？」

「手術成功後，我買俾你當係慶祝禮物。」

「咁小器？起碼買幾套啦。」

「一定。」見到佢咁輕鬆，我反而有壓力，「我先去準備一下。」

我落飯堂買咗杯咖啡定神，腦裡面重溫一次整個手術程序。

時針搭正八點，我深呼吸一下，走到手術室外。入去前，我例行進行消毒程序。我先用酒精搓手液消毒雙手，然後戴上髮套、視鏡同口罩，確定口沫唔會外洩、髮套同視鏡妥當後，就行到鋅盤攞起含氯己定及酮碘嘅番梘洗刷手指、手掌及至手臂位置。

沖洗及刷乾過後，我垂直雙手行入手術室，見到護士同技師已經將手術要用嘅工具排好、設備同機械準備好。一位護士見我入嚟，就幫我著上無菌手術袍同手套。

行到手術檯邊，我問綠瀅準備好未，佢點一點頭，主刀嘅黃醫生望望我，又望望在場所有醫護同技術員，大家點頭確認後，麻醉師就開始進行誘導。綠瀅雙眼開始瞌上，呼吸緩慢，正式進入麻醉狀態。

當護士同其中一個醫生將氣管內管放入時，我先發覺芷蔚企喺黃醫生嘅旁邊，不自禁咁講：「芷……姚醫生，點解你會喺度？」

「我唔可以喺度咩？」

「我唔係咁嘅意思……」

「多個人唔好咩？況且姚醫生都做過唔少呢類大型開胸手術嘅副刀。」黃醫生打圓場說。

插好氣管內管，麻醉師指示護士注射肌肉鬆馳劑。我哋睇住綠瀅一系列嘅維生指數變化，確認已經穩定後，開始進行手術。

正當黃醫生準備開胸時，一聲電話響起。急促嘅鈴聲顯示呢個係一個緊急求救電話。佢示意手術暫停，然後喺護士幫助下消毒雙手同電話，並以免提方式同對方通話。

「黃醫生，我係急症嘅吳醫生，呢度有病人診斷出急性主動脈剝離，需要你立即做手術。」

「咁樣……你等等我……」

黃醫生將電話靜音，同手術室每個人講：「急症室有病人需要我，但呢度有一個已麻醉嘅病人。依家有兩個辦法，一係終止手術……」

「一係由游醫生做主刀醫生繼續落去；」黃醫生望住我，「當然如果有人反對嘅話，我哋就終止手術。」

「我……做主刀？」

「你以前又唔係未做過，就算近來無做主刀，但團隊所有人都知你勝任有餘。」

「但……」

「我哋會盡力協助游醫生！」芷蔚忽然講，「請黃醫生放心，好好照顧急症室嗰位病人。」

「既然姚醫生都咁講，游醫生你點諗？」

手術室嘅空氣一下子壓向我，令我緊張得心跳加速。我正想開口講「唔好」時，聽到儀器上傳來綠瀅緩慢嘅心跳聲。

佢等緊我，而我始終要面對、穿過黑暗，行出嗰個透明嘅迷宮。

「準備開胸。」

所有人立即各就各位，黃醫生微微一笑就出咗手術室。

芷蔚幫綠瀅胸口消毒後，我就用手術刀切開佢胸口心間嘅肌肉。

「點解剛才你要特登咁講？」我攞起護士遞過嚟嘅開胸器後，細聲問佢。

「我只係想支持一個我鐘意嘅人，同分擔佢嘅一切；」芷蔚以雙手穩住綠瀅嘅胸腔，「你呢？你會點對你鍾意嘅人？」

「我只係想幫佢開心。」

我用開胸器分開佢嘅胸骨後，芷蔚就用牽開器固定打開咗嘅胸腔。我接過較剪，剪開心囊後，見到綠瀅緩慢跳動嘅心臟。雖然早知道佢因為心漏而心律紊亂、心室肥大，但親眼見到佢嘅心室同心房無法配合跳動，依然令我心酸。

芷蔚將剪開嘅心囊用針線縫到肌肉上，另一位醫生就開始注射薄血嘅肝素；而我就一邊留意血壓，一邊喺升主動脈開刀，並放入已灌注好生理鹽水、連接體外心肺循環機嘅內管。檢查好無發生動脈剝離，我就繼續喺上腔靜脈及下腔靜脈做同樣嘅程序。然後，我喺冠心循環放入內管，用嚟陣間注射心臟停搏藥物。

我哋重新確定所有連接妥當，維生指數同血液分析正常後，就示意開始分流。

我用血管鉗鉗住動靜脈，使血液流唔到入心臟，同時灌注技術師開始注射心臟停搏藥物，而同時所有人細心留意並確認體外心肺循環機嘅壓力適中、液體溫度同供氧濃度正常。

綠瀅嘅心臟因為藥物嘅反應，跳得愈嚟愈慢，直至完全停頓。

芷蔚立即將右心室打開，等我做修補手術。

但係，我竟然手震……

我一直叫自己鎮定，但雙手依然震得無法開始心室間隔嘅縫補工作。

腦海漸漸浮起紹藍發生意外嗰晚。嗰晚急症室同頭先一樣，緊急呼叫當值嘅心胸外科醫生，話有個病人胸部嚴重創傷，需要做急性開胸手術。我同其他醫生一落到去，見到竟然係紹藍。大家無辦法唔打個突，當中比較資深嘅醫生立即指示我哋進行開胸手術，我哋先醒過嚟準備。

就算當時我已經做過唔少開胸手術，但瞓喺緊急手術室嘅係紹藍，我無辦法唔緊張。因為咁樣，我雙手有些少震，令我開刀、縫針同插管嘅速度比平時慢。就喺我哋做血液分流前，主動脈血管瘤破裂引致大量出血，無論我哋點縫補、輸血，都無法令紹藍復甦… …

「游醫生，請你盡快進行修補。」芷蔚喺我對面細聲講。

可惜，我依然未開始到。

「樂楊，我等緊你幫我開心呀。」我彷彿聽到綠瀅同我講。

雙手只係移近咗半吋，但依然未碰到佢嘅心臟。

我去到呢個位，唔可以放棄… …

忽然，我見到雙手好似有另一對手捉住。我仔細望嗰對手嘅主人，竟然發覺紹藍企咗喺我旁邊。

「你係一個心胸外科手術主刀，可以咁樣做手術嘅咩？」

「我怕… …我怕好似嗰日咁救唔到你… …」

「蠢材，你嗰日做咩都救唔到我架啦，你都盡咗力。」

「但係… …我… …」

「你依家乜嘢都唔做，就真係幫唔到綠瀅。」

「我幫到綠瀅又點？佢個心始終係為你而開… …」

「唔係我想死咗都要霸住綠瀅，但你要睇清楚你個心應該為邊個開先啱啦。」

我望返綠瀅個心臟，見到芷蔚盡晒力去幫佢做縫針。

「我再問你一次，你作為一個心胸外科手術主刀，可以咁樣做手術嘅咩？」

「對唔住；」我將呢句說話講咗出口，芷蔚聽到後望一望我，「之前辛苦咗你。」

雙手已經唔再震，我好快接應咗縫針嘅工作，並將兩塊補片結實咁聯喺心室間隔上。所有縫補程序完成後，我將綠瀅個心縫合，放開血管鉗，俾血液重新注滿心臟，就再次將個心起動。

見到綠瀅個心再次跳動，就好似佢獲得新生咁，我放低心頭大石，鬆咗口氣。

最後，我哋將體外心肺循環機分離；超聲波檢查顯示血液流動正常，確認手術成功後，我哋將綠瀅嘅胸腔縫合，送咗佢去深切治療部觀察。

所有善後工作完成後，我除低所有無菌裝備，坐咗喺手術室外嘅長凳休息。

「恭喜你完成久違嘅開胸手術。」芷蔚行出手術室時對我講。

「多謝。」

「咁我走先。」

喺佢經過我面前嗰刻，我拉住佢隻手。

「我真心想多謝你……今晚可唔可以一齊食飯？」

「唔使喇，你不如諗下點樣同綠瀅慶祝仲好。」芷蔚想甩開我隻手，但我捉得好緊。

「可唔可以……俾個機會我……令你開心……支持你同分擔你嘅一切？」

「如果你真係有心嘅話，今晚八點半喺翻騰三周半陪我聽爵士樂。」

「我等你。」

佢全身泛起玫瑰嘅氣息，話俾我知我已經搵到想搵嘅人，搵到想要嘅心；而我準備全心全意，向佢一直打開嘅心扉走過去。