或者肚餓嘅緣故，老師所謂嘅換衫，我要飯後留意到。 乍看之下，佢依舊戴住幼框墨鏡，圍起嗰條棗紅色嘅頸巾，身穿同一件長長嘅大褸。直至我哋將午飯套餐食完，老師離開座位付錢時，我先見到佢雙腿裸着膝頭，套起一對長筒雪皮靴。 離開旅館之前，佢從口袋內拎出冷帽及皮手套戴上，但膝頭依然暴露於空氣中，任由寒風恣意吹刮。我唔明白。點解佢之前緊張我嘅衣著唔夠抵冷，依家自己卻對膝頭毫無保護。 我無法按住自己嘅好奇，同時帶住對呢種雙重標準嘅不滿，各自上車坐好後問：「你咁樣着唔凍？」 「我有好似你咁樣跳嚟跳去咩？」佢嘲笑話，「你唔知女生忍耐能力比男人犀利？」 「男人唔係強壯啲咩？」 「喺冬天，你會見到唔少女性着短裙，但你會唔會見到男性着短褲？」 「又……又好似係……」我諗起落雪嘅街道，情景的確如此，「但點解要咁樣做？」 「因為想做。」 「就係因為呢啲……」我怕激嬲佢，壓低咗聲音，「毫無邏輯嘅原因？」 「所有嘢到最後都係毫無邏輯，只有喺結果上俾到自己咩嘢意義。」 「就算係痛楚，或者係受苦難，只要俾到意義自己就可以？」 我嘅說話有如落喺地上嘅雪花，埋沒於白茫茫嘅寂靜雪堆中。 老師開咗差唔多一個鐘嘅車，到咗一個細小嘅公共停車場。佢示意我帶好背囊落車，然後我哋行到一個有指示牌寫住「雙繩滝．五百米」嘅山路入口。裡面山路唔算崎嶇，但因為融雪使得路面濕滑，有時要用手扶住左邊嘅石牆而行，避免跌落右邊嘅山崖。十幾分鐘後，不遠處出現一個用木柵圍住嘅小看台，老師加快腳步，幾乎喺踏上看台前跣倒。 走到看台，見老師已經背向我，四十五度抬頭望向前方。我沿住佢視線，兩幕水藍冰瀑就似霧雪中打出兩道冰雷，劈開堅硬峭壁石崖，散出尖銳如箭嘅冰錐從隙間湧出，一支支向住我雙眼直衝而來。 呢一刻，面前看台變成另一個空間。喺嗰度，所有東西被凝結。來勢洶洶嘅瀑布喺吞噬看台嘅一刻前被凝結，河內欲游嘅魚喺擺尾一刻前被凝結，本來心急差啲滑倒嘅老師喺呢刻都係被凝結。 我將被凝結嘅呢一刻濃縮喺手機入面。 可能我嘅動作，又或者時間已到，老師轉身走出看台，往左拐向石牆行去。當我正喺度疑惑嘅時候，佢喺石崖一個無咁斜嘅地方，踩上一塊石頭向上行。我追咗上去，發覺呢個位看似無路，但有輕微被行過嘅痕跡。抬頭一望，老師以近乎手腳並用嘅姿勢爬上石階。我立刻追咗上去。 呢條路既未被開發，而且又斜又迂迴，再加上雪滑，即使我對自己體力算有信心，都覺得一啲都唔容易爬。然而，我...
「阿爸，叫咗你唔使操勞，我自己搞掂就得。」見到佢又彎住老腰拎起個幾重嘅紙皮箱，我再一次勸佢。
「你第一次搬出嚟自己住，咁多嘢要執，等我幫吓你。」
「你又唔知我啲嘢要點擺，等我自己執啦。」我嗱嗱聲攞走阿爸手上個箱，放喺第二度，「你坐低休息吓喇。」
「得張矮凳仔，坐低咪仲唔舒服。」但佢講完都係坐咗落去，「不如送張梳化俾你做入伙禮物？」
「唔係唔想，不過呢度又唔係買嘅，費時第日搬仲麻煩；」我邊講邊將自己嘅嘢分類，「而且你都知點解我要搬出嚟住……」
「你驚你阿媽嬲？」
「我唔想你做夾心人啫。」
「父子無隔夜仇，何況係阿媽？」
「唔見咪無隔夜仇囉……」
「咁唔通一世唔見咩？」
「相見好，同住難；就算係你，我都係咁諗，所以一搵到工就搬出嚟。」
阿爸無再出聲，靜靜地望住我執嘢。
一瞬間嘅寧靜，令氣氛變得冰冷。
成間屋只有郁動紙皮箱時發出嘅聲音。
無耐，阿爸望望手提，拍拍膝頭企身同我講：「一點喇，同你食埋個晏我就返屋企。」
「都好……」我放低手上嘅雜物，搵返丟低唔知喺邊嘅門匙，同佢落咗樓下。
望住陌生嘅街道，我同佢好迷惘，唔知邊度有嘢食。唯有即刻用手提上網睇下附近有咩好食。
「好似過幾個街口有幢工廈，裡面有唔少嘢食揀，大約行十分鐘就到。」
「無問題，就行過去睇睇。」
一路上同阿爸打唔開話匣子，入耳只有駛往工廈嘅輕型貨車聲，同喺細街旁上落貨嘅工人叫罵聲。
嚟到工廈門口，一陣濃郁嘅咖啡香撲鼻而來。我沿住香氣往上望，見到工廈三樓其中四隻鋁窗外貼咗「零三啡廳」四個字。毫無疑問，啡香從嗰度傳嚟。
我心入面已經被啡香吸引，入𨋢時反射咁撳咗三字。
「三樓有嘢食？」阿爸問。
「有……」其實我都唔知有無。
舊式電梯到咗三樓，我拉開道閘，先讓阿爸出去自己再出𨋢。
基本上一出𨋢，就見到啡廳嘅門口。我行過去等侍應帶位時，阿爸問我：「真係要喺呢度食？」
「你唔想喺呢度食？」我好奇怪阿爸會咁問，於是反問返佢。
「如果你唔介意齋食甜品同飲嘢當晏晝，我無所謂嘅……」阿爸遞個餐牌俾我。
我呆咗一呆，無諗到呢度無嘢食。正想轉頭走嗰時，好衰唔衰個女侍應已經埋到嚟問：「先生，係咪兩位？」
得我自己的話當然無問題，但無理由要阿爸無嘢落肚；不過同個侍應講「唔係」又好似好尷尬同無禮貌
侍應同阿爸望住死咗機嘅我，直到個侍應開聲。
「兩位如果想食嘢，我會介紹隔籬嘅越南餐廳，或者二樓嘅茶餐廳；」女侍應好有禮拜咁打破冷場，「食完嘢想食甜品可以返嚟。」
「咁都好喎……」我立即順住呢個下台階同阿爸講。
「如果太晏嘅話，可以下次再嚟；或者太趕的話，我哋喺黃杏街市旁邊新開咗間咖啡站，專做快靚正嘅外賣咖啡。」
聽佢講得娓娓動聽，自自然開始留意佢身材樣貌。女侍應俾我第一個感覺就係圓碌碌。臉圓膊圓身圓臀圓。然而，我完全唔覺得佢肥，反而覺得佢好可愛。
再望真啲，先知佢一副鬼妹臉孔。一頭原生非染嘅淺亞麻髮色，平陰平腳嘅中短鮑伯頭，加埋佢嘅瞇眼笑容，更顯甜美。
直到佢轉身喺櫃台攞張卡片，遞過嚟俾我，魂魄先返翻嚟。
「呢度係我哋咖啡站嘅位置，有興趣嘅話嚟試吓。」
我接過卡片，答咗句「多謝」。
女侍應同我哋揮手拜拜，就返入啡廳做嘢。
「阿爸，茶餐廳定越南嘢？」
「茶餐比較啱我。」
「咁就落二樓囉。」
我回頭望返入啡廳，見到佢展露出剛才嘅笑容去同客人落單，心諗佢真係幾專業。
同阿爸去到茶餐廳坐低，各自叫好嘢食後，阿爸突然話：「頭先個女仔幾好人喎。」
「阿爸，你想講咩？」
「我只係見你到依家都未拍過拖，做阿爸當然會擔心喇。」
「擔心我搞基？」我笑說。
「搞基還好，就算好似你細妹咁都唔差；只係怕你咁內向，識唔到女朋友時老咗一個人孤伶伶。」
「怪唔之阿媽咁臭脾氣你都哽得落。」
「佢發忟憎都係緊張你哋。」
「你成日都咁講，反正我同細妹唔會知佢後生時係點。」
「佢嗰時……」
「你唔使同我講，無興趣知你哋以前嘅嘢。」就喺阿爸準備開口讚阿媽時，我已經閘住佢。
「你又要同佢嘈，又唔想了解佢。」
「唔通佢又試過了解我？」我開始有啲燥。
好彩嗌嘅嘢食到咗，唔係我同阿爸可能又嚟一場「激烈嘅討論」。
我哋有默契咁食晒自己面前碟飯，飲完附送嘅嘢飲，各自靜靜坐咗陣，睇睇咗陣手機，就起身準備走。
「呢餐我俾喇；」阿爸搶走咗張單，「當賀你新入伙。」
飯前嘅對話仲有餘熱，所以我無主動去搶返張單。
落返大街，我送阿爸到巴士站搭車，大家一路等巴士都無講嘢，直至巴士埋站，我講咗句「拜拜」。
「依家一個人住，樣樣都要自己嚟，真係搞唔掂就搵阿爸阿媽喇……」阿爸隨住人龍慢慢行近巴士前門，「得閒就返屋企食飯。」
「得喇……」
望住佢上咗車拍咗卡，喺窗口揮手拜拜後，我開始行返屋企。之不過行到樓下，見到路牌話繼續行五百米就會到黃杏街市，諗起剛才女侍應介紹嘅咖啡檔，諗起返到屋企又係執嘢，諗起屋企仲要一啲嘢食都無，不如行過去睇下順便買啲乾糧。
三至五分鐘嘅腳程，經過一個大型居屋屋邨，我開始隱約聽到菜檔嘅叫賣聲。行多陣，叫賣聲愈來愈嘈，而我亦見到街市嘅嘅一角。驟眼望去黃杏街市兩層高，而且佔地唔少，應該係以前為咗安置小販而設嘅舊式臨時街市。再行近啲，混雜鮮肉、魚腥同壞菜嘅臭味湧過嚟，令我即刻單手掩鼻之餘，亦加快腳步行開。
快步行到大門口，望見入面天花滴水，污水滿地，又濕又滑；檔口本來嘅白色瓷磚除咗泛黃外，仲沾上點點血斑，見到都唔開胃。
就係咁，我打消入去嘅念頭。
「既然嚟到呢頭，搵吓間咖啡站都好。」我攞出女侍應俾我嗰張卡，照住地圖繞到街市後面，就見到對面街嘅咖啡站。
「零三啡站，快將開幕。」密封嘅木板上印住八個大字。
原來未開㗎？
有被個女侍應過咗一棟嘅感覺。
再望張卡片，地圖上印住啡站附近有個大型商場。既然都行到嚟呢度，加上本來想買餸，就行多十分鐘到商場。
比起黃杏街市，商場當然乾淨又無氣味，室內光猛又有冷氣。各式各樣嘅商店同食肆立林，就算一日都未必行得晒。雖然自己唔鍾意行街買嘢，但有幾間舖賣嘅嘢都令我心動。
落地庫超市買餸，先知一菜一肉唔平，加埋油鹽米醬，埋單成幾舊水。俾錢時第一次感到阿爸阿媽平時嘅辛苦，不自覺嘆一口氣。
之不過，諗到同阿媽住嗰時成日家嘈屋閉，我就寧願捱呢種辛苦都唔想返去住。
兩手抽住幾袋餸菜，唔行返去喇，搭巴士返歸。入到門口後喺廚房放低啲嘢，繼續收拾搬過嚟嘅雜物。夜晚簡單煮咗個麵，跟住睇片睇到凌晨就上床瞓覺，抖好精神聽日返工。
留言
發佈留言