六點四十五分。 火車站正等待更多上班通勤族出現，而我同樣地等待一個人出現。 時間尚早。我心諗，但老師唔出現，始終心有不安，怕佢突然改變主意。 將近七點，趕返工嘅乘客愈嚟愈多，佢哋步伐急促，有如古戰場嘅亂箭喺面前左右飛過。一張張不時望起手錶嘅焦躁臉容，令我亦不自覺搓起雙手，右腳踏起快歌拍子。 一節短而悠揚嘅音樂響起，提醒火車站內眾人整點已到。接住一段早晨廣播，提示乘客保持秩序及小心財物，當然唔少得車站店舖趁機宣傳自家嘅商品及折扣優惠。 「天崎超市每日新鮮出爐嘅麵包，讓你精神開始每一天～」 「阿爾卡週五限定椿子咖啡，誠意為你早上加倍能量！」 喺腦內自製一陣咖啡香氣嘅時候，眾多與我不相干嘅亂箭之中，竟然有一支向我射過嚟。我立刻回過神，發現佢正係我等待嗰支箭。 嗰支令心臟不為焦急，而是因為興奮、期待同緊張嘅邱比特之箭。 我見過學校內戴上眼鏡時成熟穩重嘅佢、見過化上濃妝喺紅燈區流連嘅佢、見過自家內素顏隨便嘅佢；而今日我見到佢嘅第四面，一個化起淡妝嘅，著上鮮豔顏冬季運動裝嘅佢，予人一種活力充沛、準備冒險嘅印象。 不過喺佢微笑向我打招呼時，明顯臉容帶倦，與裝束有明顯出入。 我以揮手及「早晨」回應，喺未諗下一句前，佢遞上一張上面寫住去雨見川市嘅火車票，「仲有半個鐘，我哋去買啲早餐及飲品上車。」講完就轉身往附近嘅便利店走去。我快步跟上佢嘅背影時，可能被剛才嘅廣播影響，好想去拖起佢左手，拉到天崎超市嘅方向，買一個令佢精神飽滿嘅麵包，然後再去阿爾卡買杯椿子咖啡，幫佢掃走倦容。不過只有半個鐘時間，應該趕唔切，於是我按住自己嘅衝動，手到只伸出半吋就停低。 走入便利店後，老師手快咁將一個明太子飯團、一個燒鮭魚飯團，同一支紅茶放入購物籃，就去排隊俾錢。我要到差唔多輪到佢時，先揀好杏仁牛角包及一罐咖啡。 「咁少夠食？」佢將我揀嘅物品直接放上櫃台。 「夠食……」收銀員已經所有商品條碼掃完，膠盤正耐心等待一千三百八十日圓嘅來臨，「我嚟俾錢。」 「我講過所有費用都係我出。」佢喺我攞出萬元大鈔時，已經用信用卡俾好錢；「你收返埋啲錢。」 澀澤榮一只好乖乖返回銀包。 銀包返入褲袋前，佢已經攞起膠袋出咗便利店。「至少俾我拎住？」我伸手去攞個袋，無意間捉到佢隻手。嗰刻我有諗過縮，但從毛冷手套散出嘅涼意令我唔想鬆手。意外地，佢亦無意甩開我。就咁樣，我拖住佢揸住膠袋嘅手走到票閘前先分開。 入咗閘，上樓梯到達月台，一列...
一日有廿四小時，扣除必要瞓覺嘅八個鐘、進餐及二便大約兩個鐘，仲有十四個鐘；再者與父母同住，煮飯打掃等家務都唔太需要我去做，呢十四個鐘可以話係完全由我控制同選擇點樣過。我可以出街玩、或者睇書學習進修備課、去組紐工房幫手、甚至到繩藝廳練習。然而，喺今日——寒假嘅第一日，我花咗所有嘅時間，好似非洲大草原中嘅水牛，警戒著眼前不動卻虎視眈眈望住我嘅手機。 「等我聯絡你。」 記起琴日離開輔導室之前，老師喺我手機內嘅通訊軟體，加入咗自己嘅帳號，並將佢成為密友清單中嘅唯一成員。 「我需要好好諗下點樣輔導你呢個壞學生。」佢無等我反應，就大步走返去教員室，留低一片茫然嘅我。 究竟咁樣係咩意思？我一直諗唔透。我唔會否認妄想過自己好似電影情節般喺度被佢引誘，但實在諗唔到一個合理嘅原因令佢選擇我，而唔去「安全」、「正常」咁搵其他男人去滿足佢嘅需要。 如果呢一刻手機螢幕真係顯示佢嘅訊息，我應該理會，定係當睇唔到？ 「你成日心不在焉，隔無耐就望手機，無事嘛？」媽媽喺晚飯時問我。 「無……」我將炸雞吞落肚後講，「有個朋友話寒假約我去玩，有少少緊張。」 「女仔嚟嘅？」爸爸呵呵笑住話。 「唔……唔係……」我差啲哽親，「係一……一大班人去玩……卦……」 「即係有男有女？」爸爸繼續追擊，「有無心儀嘅同學？」 「爸爸唔好再玩阿仔啦……」媽媽插嘴後同我講，「你第一次同新朋友去玩係會緊張啲，要放鬆先唔會影響心情。」 「係……知道。」 我心裡苦笑，食完飯幫忙收拾後返入房。 手提電話熒幕閃咗一下。 怦噗、怦噗、怦噗。 睡房只聽到心跳聲。 我稍稍平復，戰戰兢兢拎起手提。 「盛屋市天氣預報：明天密雲……」 「蠢材！」我暗自大罵一聲，將手提丟到床上。 然後手提電話好似烏鴉咁回應咗一聲，我心煩得怨咗句：「又咩事！？」 再次拎起電話一睇，短訊欄上顯示咗一句。 「寒假第一日過成點？」 我唔知應該點覆佢，諗嚟諗去只識得回「還可以」。 「講大話嘅學生需要輔導。」 我心頭一震，唔知點答佢。 沉默咗幾分鐘，手機傳來一句。 「星期二準備好，放學後嚟見我。」 「我唔明。」 「你點會唔明？」下一秒，程式顯示佢已離線。 手機無再俾提示。我瞓喺床上，問天花板應該點做，佢同手機一樣無頭緒。 兩日時間嘅思前想後，我發覺諗多無用，或者邊度結束，就由邊度開始。 星期二下年四點，我著返同嗰日相同嘅衣服款式，揹上同樣嘅背囊，帶上當日老匠人送我嘅初雪祭限定麻...