或者肚餓嘅緣故，老師所謂嘅換衫，我要飯後留意到。 乍看之下，佢依舊戴住幼框墨鏡，圍起嗰條棗紅色嘅頸巾，身穿同一件長長嘅大褸。直至我哋將午飯套餐食完，老師離開座位付錢時，我先見到佢雙腿裸着膝頭，套起一對長筒雪皮靴。 離開旅館之前，佢從口袋內拎出冷帽及皮手套戴上，但膝頭依然暴露於空氣中，任由寒風恣意吹刮。我唔明白。點解佢之前緊張我嘅衣著唔夠抵冷，依家自己卻對膝頭毫無保護。 我無法按住自己嘅好奇，同時帶住對呢種雙重標準嘅不滿，各自上車坐好後問：「你咁樣着唔凍？」 「我有好似你咁樣跳嚟跳去咩？」佢嘲笑話，「你唔知女生忍耐能力比男人犀利？」 「男人唔係強壯啲咩？」 「喺冬天，你會見到唔少女性着短裙，但你會唔會見到男性着短褲？」 「又……又好似係……」我諗起落雪嘅街道，情景的確如此，「但點解要咁樣做？」 「因為想做。」 「就係因為呢啲……」我怕激嬲佢，壓低咗聲音，「毫無邏輯嘅原因？」 「所有嘢到最後都係毫無邏輯，只有喺結果上俾到自己咩嘢意義。」 「就算係痛楚，或者係受苦難，只要俾到意義自己就可以？」 我嘅說話有如落喺地上嘅雪花，埋沒於白茫茫嘅寂靜雪堆中。 老師開咗差唔多一個鐘嘅車，到咗一個細小嘅公共停車場。佢示意我帶好背囊落車，然後我哋行到一個有指示牌寫住「雙繩滝．五百米」嘅山路入口。裡面山路唔算崎嶇，但因為融雪使得路面濕滑，有時要用手扶住左邊嘅石牆而行，避免跌落右邊嘅山崖。十幾分鐘後，不遠處出現一個用木柵圍住嘅小看台，老師加快腳步，幾乎喺踏上看台前跣倒。 走到看台，見老師已經背向我，四十五度抬頭望向前方。我沿住佢視線，兩幕水藍冰瀑就似霧雪中打出兩道冰雷，劈開堅硬峭壁石崖，散出尖銳如箭嘅冰錐從隙間湧出，一支支向住我雙眼直衝而來。 呢一刻，面前看台變成另一個空間。喺嗰度，所有東西被凝結。來勢洶洶嘅瀑布喺吞噬看台嘅一刻前被凝結，河內欲游嘅魚喺擺尾一刻前被凝結，本來心急差啲滑倒嘅老師喺呢刻都係被凝結。 我將被凝結嘅呢一刻濃縮喺手機入面。 可能我嘅動作，又或者時間已到，老師轉身走出看台，往左拐向石牆行去。當我正喺度疑惑嘅時候，佢喺石崖一個無咁斜嘅地方，踩上一塊石頭向上行。我追咗上去，發覺呢個位看似無路，但有輕微被行過嘅痕跡。抬頭一望，老師以近乎手腳並用嘅姿勢爬上石階。我立刻追咗上去。 呢條路既未被開發，而且又斜又迂迴，再加上雪滑，即使我對自己體力算有信心，都覺得一啲都唔容易爬。然而，我...
喺我十六年嚟嘅短暫而未完嘅人生，眼淚喺我面前出現嘅次數用一隻手嘅手指數得完；而且全部都是出於媽媽嘅眼中。再者，嗰啲情況對我嚟講都係有跡可尋，例如我考得好成績而欣慰、我迷路而擔心、我反叛而憤怒等情緒令媽媽流淚。 之但係，呢刻老師嘅眼淚同痛哭，突如其來又毫無邏輯，令我腦內忽然空白，完全做唔出任何反應，只能目定口呆望住佢喊濕半邊枕頭。 時間彷彿同時流動及靜止。 直至某一秒，隔籬鄰居大門重重被閂埋，發出震烈聲響，將房間內一對平行空間打破、重新縫合，我先意識到老師已經停止哭泣，兩眼疲倦無神望住我。 「解開我……」 所有繩索被收回，重新紮好。老師重獲自由後，最想做嘅事就係合埋眼。我見佢打咗個冷震，立即為佢冚被，好快佢呼吸漸慢，沉沉睡去。 著返衫褲、揹好背囊、閂實大門，帶住一片迷茫走到街上。嘗試從老師臉部表情去找出眼淚嘅原因，但未有頭緒已經行到屋企門口。 「你去咗邊？咁夜先返屋企？」一開門就見媽媽喺梳化衝出嚟問，「頭先發生咩事？做咩事咁匆忙？」 「我……我……頭先有啲緊要嘢唔記得帶俾朋友，所以……心急咗少少，對唔住……」 「都唔駛叫極都唔應。」 「對唔住；」我低頭避開媽媽嘅視線，偷望爸爸嘅神情，但捕捉唔到確實情緒，「我去沖涼先……」 扭開水龍頭，將熱水注入浴缸，蒸氣慢慢上升。我故意將溫度校得比平時高，除咗想快速和暖寒冷嘅身體外，仲希望放鬆頭腦，好好整理剛才嘅事。可惜，即使我以最放鬆同清醒嘅狀態，依然理唔出一個邏輯。我決定放棄，抹乾身、換好衫後，快快行返入房。 既然諗唔到一個理由，又唔想驚動爸媽，唯有喺網絡尋搜女人流眼淚嘅原因。數千萬個結果一按而出。唔少網站話女人受委屈而喊，但我點諗都唔覺自己令佢傷心或冤枉。 始終無一個準確原因，我忽然諗起工房中嘅老婦人；以佢嘅年紀，可能俾到一啲頭緒？ 於是過咗兩日，要到工房幫忙嘅日子，趁老婦人入廚房時，我借故跟埋去。 「老婆婆……」確認廚房只有我同佢兩人後，「我想請教你一件事。」 「咩事？」老婦人首先錯愕，然後親切摺起魚尾紋笑說。 「嗯……」我有些少難以啟齒，但最後都問咗出口；「女人會因咩事而流眼淚？」 「呵呵……」老婦人笑咗幾聲後，走到門口將廚房門閂埋，「點解搵我講呢啲嘢？唔搵老頭子？」 本來我想支吾帶過，話關於女性嘅事搵返女性比較好，但我始終講咗心嗰句：「我記起繩藝廳嗰張大相，覺得老匠人對女性有種征服同霸道，未必幫到我解決問題。」 「哈哈……...