或者肚餓嘅緣故，老師所謂嘅換衫，我要飯後留意到。 乍看之下，佢依舊戴住幼框墨鏡，圍起嗰條棗紅色嘅頸巾，身穿同一件長長嘅大褸。直至我哋將午飯套餐食完，老師離開座位付錢時，我先見到佢雙腿裸着膝頭，套起一對長筒雪皮靴。 離開旅館之前，佢從口袋內拎出冷帽及皮手套戴上，但膝頭依然暴露於空氣中，任由寒風恣意吹刮。我唔明白。點解佢之前緊張我嘅衣著唔夠抵冷，依家自己卻對膝頭毫無保護。 我無法按住自己嘅好奇，同時帶住對呢種雙重標準嘅不滿，各自上車坐好後問：「你咁樣着唔凍？」 「我有好似你咁樣跳嚟跳去咩？」佢嘲笑話，「你唔知女生忍耐能力比男人犀利？」 「男人唔係強壯啲咩？」 「喺冬天，你會見到唔少女性着短裙，但你會唔會見到男性着短褲？」 「又……又好似係……」我諗起落雪嘅街道，情景的確如此，「但點解要咁樣做？」 「因為想做。」 「就係因為呢啲……」我怕激嬲佢，壓低咗聲音，「毫無邏輯嘅原因？」 「所有嘢到最後都係毫無邏輯，只有喺結果上俾到自己咩嘢意義。」 「就算係痛楚，或者係受苦難，只要俾到意義自己就可以？」 我嘅說話有如落喺地上嘅雪花，埋沒於白茫茫嘅寂靜雪堆中。 老師開咗差唔多一個鐘嘅車，到咗一個細小嘅公共停車場。佢示意我帶好背囊落車，然後我哋行到一個有指示牌寫住「雙繩滝．五百米」嘅山路入口。裡面山路唔算崎嶇，但因為融雪使得路面濕滑，有時要用手扶住左邊嘅石牆而行，避免跌落右邊嘅山崖。十幾分鐘後，不遠處出現一個用木柵圍住嘅小看台，老師加快腳步，幾乎喺踏上看台前跣倒。 走到看台，見老師已經背向我，四十五度抬頭望向前方。我沿住佢視線，兩幕水藍冰瀑就似霧雪中打出兩道冰雷，劈開堅硬峭壁石崖，散出尖銳如箭嘅冰錐從隙間湧出，一支支向住我雙眼直衝而來。 呢一刻，面前看台變成另一個空間。喺嗰度，所有東西被凝結。來勢洶洶嘅瀑布喺吞噬看台嘅一刻前被凝結，河內欲游嘅魚喺擺尾一刻前被凝結，本來心急差啲滑倒嘅老師喺呢刻都係被凝結。 我將被凝結嘅呢一刻濃縮喺手機入面。 可能我嘅動作，又或者時間已到，老師轉身走出看台，往左拐向石牆行去。當我正喺度疑惑嘅時候，佢喺石崖一個無咁斜嘅地方，踩上一塊石頭向上行。我追咗上去，發覺呢個位看似無路，但有輕微被行過嘅痕跡。抬頭一望，老師以近乎手腳並用嘅姿勢爬上石階。我立刻追咗上去。 呢條路既未被開發，而且又斜又迂迴，再加上雪滑，即使我對自己體力算有信心，都覺得一啲都唔容易爬。然而，我...
「屌那星！」 「咩事咁躁呀？」 「明明嗰條八婆就快得手，竟然殺出個程咬金，被個巴士佬媾咗！」 「你都係諗住𡁻完鬆架喇，做咩咁嬲？」 「呢啖氣吞唔落嘛！」 拍踏。 我就咁被踢到飛起，越過鐵欄杆，噗通一聲從碼頭跌入海水裡。 於是我開始飄流，同各式各樣嘅垃圾隨住海浪上下浮沉。雖然非常臭，但比起被遺失後嘅生活好好多。 記得嗰時無事發生，淨係被日曬雨淋已經係最好嘅事。只不過每日總會被人有心無意踩兩下，或者被當波踢一段路。有時野狗行過見到我，就會當我玩具叼起嚟又咬又扯。本來整齊嘅衣服，好快變得破破爛爛，遮蓋唔到我嘅身體。被野狗玩咗幾次後，最後一塊布離我而去，開始赤裸於人前。 然後有一個夜晚，喺一張鐵長凳下嘅一個角落嘅我，被一個男人執起咗。暗黃街燈映照一身亮麗嘅西裝。佢唔嫌污糟，左手揸實我身體，喺佢眼前來來回回仔細咁望。然後，佢大姆指開始喺我嘅肚皮打轉，同時猛啱轉頭左望右望。佢好似確定咗啲嘢後，左手姆指往上向我乳頭係咁捽；右手拉開褲鏈，掏出佢嘅陰莖係咁擢。無耐佢打咗冷震，將陰莖移向我，一堆白液射落我臉同手上。佢滿足地收起佢性器，左手依然揸住我，右手攞咗包煙，推開盒蓋叼咗支煙出嚟。 男人攞出火機點著支煙，吸咗幾口，眼定定咁望住我。半支煙後，佢獰猙而猥瑣咁笑，用煙頭係咁焫落我身同大脾上。佢好開心咁笑咗一聲，再將煙頭焫落我兩邊乳頭同兩腿之間。男人見到自己嘅藝術品後更加興奮，扯住氣咁笑咗好耐，我望住一顆紅點愈嚟愈近，然後佢瘋狂痴態嘅臉孔係我最後見到嘅嘢。 每夜夢魘，都係嗰晚嘅情景；夜闌人來，總怕發生同樣事情。好想一了百了，但我喺自然環境下近乎不死，能殺死我嘅人為方法亦唔多，況且無人會忽發慈悲去做呢件事。 我預視我嘅終局，就係永永遠遠喺堆填區每晚重覆呢個惡夢，一如西西弗斯無盡地推舊石頭上山。 浮沉咗十幾日，以為好快會有海義工將我同其他垃圾執起送我去堆填，但佢哋一直都無出現。相反，近日漁船出海嘅數量多過平時好多。 本來唔多關我事，但今日有艘漁船殘餘嘅魚絲勾起我嘅左臂，帶咗我出比較水深嘅海灣。碼頭邊嘅垃圾離我愈嚟愈遠，空氣愈嚟愈清新，我唔奢望佢可以消除我嘅痛苦，但佢俾到我有如吸毒後嘅一絲抽離。 漁船開到咁上下，慢慢減速，喺某個區域不斷打轉。船上嘅人開始興奮吵鬧。 「見到喇！見到喇！」 「佢個口好大！一定吞到好多嘢！」 「相信以後都無機會喺呢度睇到。」 忽然，漁船一個急轉彎，勾住我嘅魚絲甩咗。...