六點四十五分。 火車站正等待更多上班通勤族出現，而我同樣地等待一個人出現。 時間尚早。我心諗，但老師唔出現，始終心有不安，怕佢突然改變主意。 將近七點，趕返工嘅乘客愈嚟愈多，佢哋步伐急促，有如古戰場嘅亂箭喺面前左右飛過。一張張不時望起手錶嘅焦躁臉容，令我亦不自覺搓起雙手，右腳踏起快歌拍子。 一節短而悠揚嘅音樂響起，提醒火車站內眾人整點已到。接住一段早晨廣播，提示乘客保持秩序及小心財物，當然唔少得車站店舖趁機宣傳自家嘅商品及折扣優惠。 「天崎超市每日新鮮出爐嘅麵包，讓你精神開始每一天～」 「阿爾卡週五限定椿子咖啡，誠意為你早上加倍能量！」 喺腦內自製一陣咖啡香氣嘅時候，眾多與我不相干嘅亂箭之中，竟然有一支向我射過嚟。我立刻回過神，發現佢正係我等待嗰支箭。 嗰支令心臟不為焦急，而是因為興奮、期待同緊張嘅邱比特之箭。 我見過學校內戴上眼鏡時成熟穩重嘅佢、見過化上濃妝喺紅燈區流連嘅佢、見過自家內素顏隨便嘅佢；而今日我見到佢嘅第四面，一個化起淡妝嘅，著上鮮豔顏冬季運動裝嘅佢，予人一種活力充沛、準備冒險嘅印象。 不過喺佢微笑向我打招呼時，明顯臉容帶倦，與裝束有明顯出入。 我以揮手及「早晨」回應，喺未諗下一句前，佢遞上一張上面寫住去雨見川市嘅火車票，「仲有半個鐘，我哋去買啲早餐及飲品上車。」講完就轉身往附近嘅便利店走去。我快步跟上佢嘅背影時，可能被剛才嘅廣播影響，好想去拖起佢左手，拉到天崎超市嘅方向，買一個令佢精神飽滿嘅麵包，然後再去阿爾卡買杯椿子咖啡，幫佢掃走倦容。不過只有半個鐘時間，應該趕唔切，於是我按住自己嘅衝動，手到只伸出半吋就停低。 走入便利店後，老師手快咁將一個明太子飯團、一個燒鮭魚飯團，同一支紅茶放入購物籃，就去排隊俾錢。我要到差唔多輪到佢時，先揀好杏仁牛角包及一罐咖啡。 「咁少夠食？」佢將我揀嘅物品直接放上櫃台。 「夠食……」收銀員已經所有商品條碼掃完，膠盤正耐心等待一千三百八十日圓嘅來臨，「我嚟俾錢。」 「我講過所有費用都係我出。」佢喺我攞出萬元大鈔時，已經用信用卡俾好錢；「你收返埋啲錢。」 澀澤榮一只好乖乖返回銀包。 銀包返入褲袋前，佢已經攞起膠袋出咗便利店。「至少俾我拎住？」我伸手去攞個袋，無意間捉到佢隻手。嗰刻我有諗過縮，但從毛冷手套散出嘅涼意令我唔想鬆手。意外地，佢亦無意甩開我。就咁樣，我拖住佢揸住膠袋嘅手走到票閘前先分開。 入咗閘，上樓梯到達月台，一列...
又到年尾鞭屍時候。 上年講過唔話今年想點，廢事燈死自己，果然無風無雨。 不過又唔係萬曆十五年咁無事可記，否則就唔會有呢篇文。 驚咗兩年幾，終於喺今年二月尾中咗武肺。唔知係咪未真正患過感冒，我唔覺比感冒弱。頭兩日燒下又停，要定時食必理痛，唔想落床，同家人隔離。到第四日叫精神啲後，就開始勁咳，咳到肺痛又有血絲。就算隔離足七日，啲咳都係未停晒，要請多一兩日假。 執筆之時正值香港取消大部分限制，網上一片「零針戰勝歸來」。或者身處地方唔同，所見所聞所信唔同，第一次聽到時自己對呢句話有些少反感。畢竟有人唔似佢哋健健康康，無長期病患，中咗當係弱感冒。 不過，當睇多一面，究竟佢哋所謂嘅「戰勝」係針對邊一類人講。有對政權迫針嘅一種反抗、有對嗰班咒佢哋唔打針會死嘅嗰班人，令我些少理解到講呢句話嘅原因。誠然，打唔打都係自己經過考慮嘅決定，而且喺呢個多變嘅情況，雙方都唔應以「勝敗」去評論。 寫作方面，一直話要執下啲舊文，今年叫做完成一部分。講嘅係《極光南下》。重新大修過一次，將啲劇情搬下次序，令之後續寫時睇上嚟（自己覺得）比較順暢。有時見到呢個故已經七萬幾字，夠出書有餘，但覺得自己質唔等於量，加上又未完，無謂破壞環境，浪費資源。 修完《極光南下》，又手痕續寫《嫖客》。上年續寫時已經諗住係寫四個唔同嘅主角，喺同一時空同一件事上嘅故事。不過寫到呢個角色時，自己本身對呢種人物背景唔太熟，寫嗰時有些少阻滯。至於《啡站情緣》，唔知係咪嗰件小事嘅感覺已經消殆，暫時未有心繼續寫。 今年追返新番，雖然唔係套套追，但睇咗嘅暫時都好滿意。《Blue Lock》見到千切擺脫枷鎖之時，睇到我好震奮。《孤獨搖滾》嗰幾段台上演奏，同樣地擺脫自身限制而發光發亮，令我非常感動，不斷重溫嗰幾節片段。然後，喺琴日知道原來出咗專輯，不禁反覆重播呢張大碟。 今年開始上多咗 Discord，感覺好似以前啲討論區。幾鍾意上面嘅討論或話題比較集中，少好多雜訊，更有唔少啟發自己嘅資訊同用者，之後應該會上多啲。 今年少咗聽歌、少咗睇星，多咗睇動畫；來年想睇多啲書、寫多啲故、做多啲運動。 共勉之。