「媽，我頭先撞到個朋友，想一齊食飯，今晚會遲啲返屋企。」 「係咪女仔呀？」電話另一邊嘅語音笑住講，「記住唔好太夜返屋企。」 我答咗「知道」後收咗線，結城老師就遞咗個餐牌過嚟，一睇先知呢間餐廳嘅嘢食幾貴，立即諗到自己嘅零用錢夠唔夠。 「放心，老師請你。」佢好似睇穿我嘅心思，「無理由要一個無收入嘅學生食咁貴嘅晚飯。」 「唔……唔使嘞……我俾得起嘅……」作為男生，覺得無論對方係邊個，都應該要表示大方。 「噗哧！」老師忽然掩嘴一笑，「你只係十六歲，未需要扮老成大體，但我相信你會知分寸，唔會叫過量或過貴嘅嘢食嘅。」 「當……當然唔會。」 「唔介意我飲酒嘛？」 「唔介意……平時老師會飲酒？」 「本身唔係成日飲，只係今晚有酒癮。」 「唔搵朋友陪你？」 「我呢個年紀，身邊嘅朋友都結晒婚或有男朋友，唔想打擾佢哋。」 「所以你搵… …牛郎？」 結城老師靜咗一陣，未開口答我前被走過嚟嘅侍應搶先開口。我哋只好轉換話題，點好自己想食嘅菜式。 然後，打斷咗嘅說話再無連上。 我哋靜靜咁等侍應放低各自嘅餐點，輕輕咁拎起刀叉，切開各自嘅食物，放入口內慢慢咀嚼。餐廳播起一首好舊嘅英文歌，去到副歌部分，樂隊不停唱住「Let it be」。 我唔係好知點解，只覺得佢同老匠人嘅說話不謀而合。 「對唔住，結城老師。」意粉剩低一半時，我放下刀叉望住白色圓碟上嘅青口講。 「做咩事無端端道歉？」佢亦放低餐具，右手溜入我視線中，拎起眼角內嘅酒杯。我隨住紅酒望向佢。 「嗰排我心好煩，因為無論我做咩嘢、喺咩時候，個腦就會浮現一個女仔嘅模樣；」我將目光稍稍移到佢臉側空白嘅牆，「我做咗好多嘢去壓抑，令自己唔去想去諗，但都無作用。我唔知點去面對、去排解，然後嗰日你關心我嘅時候，我煩躁得對你大聲無禮說話，所以想道歉。」 結城老師放低酒杯，鬆一口氣微笑說：「如果你係同我一樣年紀，我會話咁大個人仲煩呢啲小事，但十六歲嘅你，呢啲係足以影響將來嘅人生大事，所以你放心，我唔會怪你或者嬲你。」 「唔好意思……」 「個女仔係邊個？講唔講得被我知？」結城老師嘅語氣同神情，好似返到佢中學時同班上同學聊八卦嘅模樣。 「唔……佢係我以前初中嘅同學……」 「講多啲俾我聽下？大概係咩樣？你同佢點識？有過咩交流？」佢興奮得大口大口飲完杯酒後，舉手叫侍應續杯。 我被佢一連串嘅問題嚇親，連忙喺腦內搵初中時校園生活點滴去應付。結城老師一邊呷住紅酒，一邊聽我似是而...
我一向唔信星座。 星座書成日話我係火象星座，係一個熱情、主動、開朗嘅人，但我一直唔覺得自己係呢種人。回想自己嘅過往種種行為同對事嘅回應，總係被動同收收埋埋，就算有委屈都多數將件事放置唔理，覺得時間會沖淡及治療一切。 反觀，一樣係火象星座嘅阿璇，就百分百展現出應有嘅性格。佢有着射手座應有嘅行動力，諗到做咩就做咩。如果有清晰嘅目標，就會窮追不捨，直至做到或得到為止。 外人聽到阿璇呢種性格，一定會諗到佢係一個衝動而魯葬嘅人。不過作為阿哥，對咗廿幾年，佢好清楚點樣控制自己接近目標嘅速度、把弓射到幾遠、支箭射唔射得中。就好似讀書咁，佢喺鍾意同擅長嘅科目入面無一年全校唔係三甲，但其他只有合格多少少。 至於感情方面，佢鍾意嘅就會盡力去追求，開始後會喺拍拖過程中知道對方嘅底線同局限。去到覺得會傷害對方或強迫自己嘅位置，就同對方坦白，尋求一個中和點，如果無嘅話就斷然斬纜，唔會拖泥帶水。 所以，阿璇見到我唔嗲唔吊，心入面一定又嬲又心急。 「點解一定要講清楚？」 阿璇一聽到就睥住我，着晒火嘅眼神唔使望都感覺到。 「一句講晒，你唔問我問，你知我最討厭唔清唔楚。」 「好……好，我問……」 「唔只係問，係問清楚。」 「得……應承你。」 之後，我同阿璇各自食自己嘅早餐。我一邊食一邊諗點樣拆掂呢件事。阿璇肯定唔會放過我，但問女啡師我又怕尷尬。唔覺唔覺牛角包同咖啡已經消失，但對策依然未喺我腦出現。 「行啦！唔好同我拖時間。」 「唔好咁惡，俾少少面好無？話晒都係阿哥。」 「就係因為阿哥，我先睇唔過眼，唔想唔理。」 我知雖然阿璇係細妹，但好多嘢佢照顧我，多過我照顧佢，好多時真係我係細路多過阿哥。 「咁……行囉。」 我哋將食完嘅空杯紙袋丟入垃圾筒，阿璇急不及待起身行去啡站，我嗌都嗌唔住。返到嚟啡站，見到排咗條唔短嘅隊，就立刻同佢講：「唔係要因為呢件小事等到無人嘛？排到都未必問得清楚啦。」 阿璇谷住道氣，無從發洩，但的確又無符。 正當我想同佢講返屋企時，一把熟悉嘅女聲響起。 「做咩返嚟嘅？想續杯？」 一把活潑嘅聲音，唔擰轉頭都知係邊個。見到阿璇個樣由鼓埋泡腮，變成暗自偷笑，更加唔駛懷疑。 「唔係……」我轉頭同女啡師講，「啡站咁忙你唔幫手咩？」 「啱啱去咗休息嘛，依家咪返嚟囉。」 「咁我唔阻……」 阿璇聽到我咁講，故意咳咗聲提醒我。 「等陣……」我立刻轉口風，「我想你問一啲嘢。」 「咩嘢？咖啡嘢？簡單嘅可以即...